Евроиттифоқ АҚШдан жиноятчиларни қатл қилишни тўхтатишни сўради
Европа Иттифоқи 19 ноябрда АҚШда президентлик сайловларидан кейин ҳукумат алмашаётган бир паллада ўлим жазоси ижро этилганидан хавотирда эканини билдирди. Евроиттифоқ ҳукумати АҚШ администрациясидан қатлларни тўхтатишни сўради.
«Евроиттифоқ ўлим жазосининг ижро этилишига қарши эканини эслатиб ўтади ва АҚШ администрациясидан ушбу қарорни ҳар қандай шароитда исталган вақтда қайта кўриб чиқиш ва федерал даражадаги қатлларни тўхтатишни талаб қилади», — дейилган иттифоқ баёнотида.
Евроиттифоқ ташқи сиёсий хизматининг қайд этишича, Европа Иттифоқи ўлим жазосини ғайриинсоний ва шафқатсиз деб ҳисоблайди, у жиноятларни камайтириш ёки тўхтатиш омили бўлиб хизмат қила олмайди. Баёнотда, шунингдек, суднинг қарори хато чиқарилса, жазо ижро этилгач уни тўғрилашнинг имкони бўлмаслиги билдирилган.
АҚШ 2019 йил ёзидан бошлаб федерал даражада ўлим жазосини ижро этишга қайтган. Бунгача федерал қатллар сўнгги бор 2003 йилда амалга оширилган. Шунга қарамай, мамлакатнинг айрим штатларида қатл ҳукмига ҳанузгача рухсат берилади.
Мораторийдан кейинги биринчи ўлим ҳукми 2020 йил 13 июлида амалга оширилган. Шу куни 1996 йилда уч кишидан иборат оилани ўлдирган 47 ёшли Даниэль Льюис Ли қатл қилинган. Шундан кейин АҚШда федерал даражада яна 8 нафар жиноятчига ўлим ҳукми ижро этилди.
2019 йилги маълумотларга кўра, АҚШда 2600 дан ортиқ маҳбус ўлим жазосига ҳукм қилинган. Федерал доирада эса 62 кишига шундай жазо тури тайинланган.
Death Penalty Information Center маълумотларига кўра, 2019 йилда мамлакатда 22 нафар маҳкум қатл қилинган. Ўлим жазоси Алабама, Жоржия, Теннесси, Флорида, Миссури, Жанубий Дакота штатларида ижро этилган. Деярли барча маҳкумлар танага инъекция юбориш йўли билан ўлдирилган.
Август ойида АҚШ федерал ҳукумати илк бор ҳинду миллатига мансуб шахсни қатл этган, октябрда эса федерал ҳукумат 67 йил ичида биринчи марта аёл кишини қатл қилиши ҳақида хабар берилган.
