Бразилиянинг Сан-Пауло шаҳрида Carrefour супермаркетлар тармоғи икки қўриқчиси қора танли одамни уриб ўлдирганлиги туфайли намойишчилар ушбу дўконга ҳужум қилди, деб хабар бермоқда «РБК», Diario de Pernambuco’га таяниб.
Қайд этилишича, намойишчилар супермаркетга тош отган ва уни ичкаридан вайрон қилган. Шунингдек, дўкон яқинида турган машиналар ҳам зарар кўрган. Полиция ҳозирча вазиятга аралашмаяпти.
Воқеа жойидан олинган видео Бразилиянинг G1 телеканали томонидан эълон қилинган. Унда одамлар супермаркетдаги озиқ-овқатни сочаётгани ва пештахталарга ўт қўяётгани акс этган.
Намойишларни қўзғатган воқеа 20 ноябрь куни Порто-Алегрдаги Carrefour супермаркетида содир бўлган. 40 ёшли Жоао Силвеира билан дўкон харидорларидан бири ўртасида можаро юзага келган, харидор аёл чақирувига кўра етиб келган икки қўриқчи унга ташланган. ОАВ маълумотларига кўра, шифокорлар Жоао Силвеира бўғиб ўлдиришдан вафот этганини маълум қилган.
https://twitter.com/rappersmolho/status/1329805512242819075
Гувоҳлар ижтимоий тармоқларга қўриқчилар марҳумни калтаклагани акс этган видеони жойлаганидан сўнг Carrefour супермаркетлар тармоғи воқеа учун узр сўраган. Шунингдек, ушбу ҳодисага алоқадор ходимлар ишдан бўшатилишини хабар қилган. Бундан ташқари, компания вакили Силвеира оиласига барча керакли ёрдамни кўрсатишга ваъда берган.
Эслатиб ўтамиз, шу йилнинг май ойида АҚШда қора танли америкалик Жорж Флойд полиция томонидан ҳибсга олинаётганда ўлдирилганди. Бунинг ортидан мамлакат бўйлаб ҳуқуқ тартибот органлари шафқатсизлиги ва ирқий тенгсизликка қарши оммавий норозилик намойишлари авж олди ва Black Lives Matter («Қора танлиларнинг ҳаёти муҳим») ҳаракати пайдо бўлди. Бразилиядаги каби АҚШда ҳам норозиликлар фонида тартибсизликлар бошланган, полиция ва намойишчилар ўртасида тўқнашув ҳам бўлганди.
Изоҳ (0)