Гватемалада ижтимоий соҳага (таълим, соғлиқни сақлаш, инсон ҳуқуқларининг бузилишига қарши кураш) бюджет харажатлари қисқартирилишга қарши намойишчилар Конгресс биносига ёнувчи модда солинган бутилкалар ташлаб, ўт қўйди. Бу ҳақда Prensa Libre нашрига таяниб, «РБК» хабар берди.
Қайд этилишича, бинодаги ёнғинни ўчиришга эришилган. Бу вақтда намойишчилар Конгрессга тош ота бошлаган, оқибатда айрим кишилар жароҳатланиб, тиббий ёрдамга муҳтож бўлган.
https://twitter.com/Quicktake/status/1330331780822478849
Тажовузкор намойишчиларни тарқатиш учун полиция кўздан ёш оқизувчи газдан фойдаланган.
Шундан сўнг президент Алехандро Жамматтеи намойишчиларни ўз фуқаролик позицияларини тинч йўл билан ҳимоя қилишга чақирган. Бу ҳақда у ўзининг Twitter’даги саҳифасида билдирган. Давлат раҳбари бузғунчиликка алоқадор бўлганларнинг барчаси амалдаги қонунчиликка мувофиқ жавобгарликка тортилишини таъкидлаган.
Шунингдек, Бразилиянинг Сан-Пауло шаҳрида қора танли эркак супермаркет қўриқчилари томонидан ўлдирилганидан сўнг тартибсизликлар бошлангани ҳақида хабар берилган эди.
Изоҳ (0)