Озарбайжонда коронавирус тарқалишининг олдини олишга қаратилган махсус карантин режими 28 декабрга қадар узайтирилди. Бу ҳақда республика тезкор штабига таяниб, «Интерфакс» хабар берди.
Озарбайжонда вирус тарқалишининг олдини олиш мақсадида махсус карантин режими 28 декабрь соат 06:00 га қадар узайтирилди, дейилади хабарда.
Маълум қилинишича, 21 ноябрь соат 00:00 дан 28 декабрь соат 06:00 га қадар Озарбайжон ҳудудида жамоат транспортлари ҳаракатланмайди. Шу сабабли Боку метросининг фаолияти ҳам 28-декбарга қадар тўхтатилади. Бундан ташқари, ҳужжатда ёзилишича, «21 ноябрдан 28 декабрга қадар ҳар шанба ва якшанба кунлари бутун мамлакат ҳудудида дорихоналар, озиқ-овқат дўконларидан ташқари, барча хизмат кўрсатиш объектлари фаолияти тўхтатилади».
Хусусий ва давлат корхоналарида ишга чиқадиган ходимлар сони 30 фоизга қисқартирилади.
Коронавирус инфекциясининг тарқалишини олдини олиш мақсадида 21 ноябрдан Озарбайжонда ҳимоя ниқобларини тақиш мажбурий этиб белгиланган.
Сўнгги маълумотларга кўра, мамлакатда коронавирусга чалинганларнинг умумий сони 87 минг кишидан ошган, вирус қурбонлари сони 1079 кишига етган.
Эслатиб ўтамиз, 21 июндан Озарбайжоннинг саккизта йирик шаҳрида, жумладан, Бокуда ҳам икки ҳафталик қатъий карантин бошланган эди. Август охирида эса алоҳида карантин режими 30 сентябрга қадар узайтирилган.
Изоҳ (0)