Қорақалпоғистоннинг Нукус шаҳри ва Тошкент вилоятининг Янгийўл туманида ис газидан заҳарланиш ҳолатлари қайд этилди. Бу ҳақда Бош прокуратура матбуот хизматига таяниб, «Xabar.uz» маълум қилди.
Қайд этилишича, Қорақалпоғистон марказидаги кўп қаватли уйларнинг бирида ижарада яшаб келаётган Нукус давлат педагогика институтининг талабаси бўлган тўрт нафар қиз хонадонда ўрнатилган иситиш қозонхонаси қувуридан сизиб чиққан ис газидан заҳарланган. Бу ҳақда 20 ноябрь куни маълум бўлган.
Шу куни Янгийўл тумани «Қовунчи» маҳалла фуқаролари йиғини ҳудудида истиқомат қилувчи бир оиланинг беш нафар аъзоси (ота-она, уч нафар вояга етмаган фарзанд) ҳам яшаб келган уйнинг ошхонасида ис газидан заҳарлангани айтилмоқда.
Заҳарланганларнинг барчаси шифохонага ётқизилган. Вафот этганлар ҳақида маълумот йўқ.
Хабарда айтилишича, ҳар икки ҳолат бўйича (маҳаллий прокуратура органлари томонидан) терговга қадар текширув ҳаракатлари олиб борилмоқда.
Аввалроқ Навоийда икки нафар ака-ука ис газидан заҳарланиб вафот этгани, Самарқандда қўлбола печдан ис гази сизиб чиқиши оқибатида ёш эр-хотин вафот этгани, кейинроқ улар икки кун аввал турмуш қургани маълум бўлганди.
Изоҳ (0)