Тахиатош ИЭС авария ҳолатида ўчиб, 20 ноябрь куни Қорақалпоғистоннинг барча шаҳар ва туманларида соат 11:00 дан бошлаб, турли вақт оралиғида электр энергияси таъминотида вақтинчалик узилишлар юз бергани маълум бўлди.
«Kun.uz»нинг хабар беришича, Тахиатош ИЭСда техник носозлик ҳолати кузатилган. 18 ноябрь куни 23:22 вақти билан 1-буғ-газ қурилмасидаги техник носозлик туфайли ИЭС ишдан тўхтатилган. 20 ноябрь куни 16:35 вақти билан нуқсонлар бартараф қилиниб, қурилма ишга туширилган.
Тахиатош ИЭС масъул ходимининг маълум қилишича, ҳозирда станция 250 мВ қувват билан ишламоқда.
Бундан аввал Наманган вилоятида жойлашган Тўрақўрғон ИЭСнинг иккита энергоблоги 20 ноябрь куни авариявий тўхташи натижасида мазкур станция орқали энерготизимга етказиб берилаётган қувват 600 мегаваттга камайгани ҳақида хабар берилганди. Бунинг оқибатида Фарғона водийси вилоятлари, Тошкент шаҳри, Самарқанд, Бухоро ва Қашқадарё вилоятларида электр энергияси таъминотида автоматик равишда чекловлар киритилганди. Кейинчалик Энергетика вазирлиги матбуот хизмати юзага келган носозлик бартараф этилгани, станция тўлиқ қувватда ишлаётганини маълум қилди.
Изоҳ (0)