Xiaomi компанияси Ҳиндистондаги байрам савдоларида 13 миллиондан ортиқ қурилма, хусусан, 9 миллион смартфон сотганини расман маълум қилди, деб хабар беради IXBT.
Аввалроқ Realme ушбу давр оралиғида 8,3 миллион маҳсулот, жумладан, 6,3 миллион смартфон сотиб рекорд ўрнатганини маълум қилганди. Таҳлилчиларнинг таъкидлашича, айнан Realme Xiaomi Samsung ва Vivo’дан кўра кўпроқ хавф туғдиради, чунки ойдан ойда Realme савдолари сезиларли даражада ўсмоқда. Яқинда Realme 50 миллион смартфон сотиб, янги маррани бозордаги мавжуд компаниялардан тезроқ забт этди.
Xiaomi компаниясининг эса Xiaomi Mi 10Т Pro, Redmi Note 9 Pro Мах, Redmi Note 9 Pro, Redmi 9 Prime, Redmi 9 ва Redmi 9А моделлари оммалашган. Қолган 4 миллион қурилма орасидан «ақлли» телевизорлар, «ақлли» уйлар учун қурилма ва аксессуарлар ўрин олган.
Хусусан, 450 минг дона «ақлли» телевизор, шунингдек, Mi TV Stick ва Mi Box 4К приставкалари сотилган. Xiaomi’нинг маълум қилишича, 4К-телевизорларга бўлган талаб ўтган йилгидан юқори, 50 ва 55 дюймли телевизорлар савдоси 50 фоиздан кўпроққа ошган. Ҳавони тозаловчи қурилмалар савдоси эса 100 фоизга ошган, шунингдек, Mi Watch Revolve соатлари ҳамда «ақлли» колонкаларга бўлган талаб ҳам ортган.
Аввалроқ «Бўйдоқлар куни» муносабати билан ўтказилган чегирмалар дунёдаги энг йирик онлайн-савдолардан бирига айлангани тўғрисида хабар берилганди.
Изоҳ (0)