Инсонлар умрининг ўртача қанча вақтини смартфонлар учун сарфлайди?

Whistle Out тадқиқот компанияси замонавий инсонлар ҳар куни смартфонга қанча вақт сарфлашини аниқлади, деб хабар беради Hi-Tech.Mail.ru.

Тадқиқот давомида учта гуруҳдаги минг киши ўртасида сўров ўтказилган — «бумерлар» (1946—1964 йилларда туғилганлар), «Х авлод» (1965—1980 йиллар) ва «миллениаллар» (1981—1996 йиллар). Улардан кунига ўртача қанча вақт смартфонга сарфлашлари сўралган.

Маълум бўлишича, учала гуруҳдагилар орасида смартфонлардан фойдаланиш бўйича у қадар катта бўлмаган фарқ мавжуд. «Бумерлар» ўртача 2,5 соат, «Х авлод» — 3 соат, «миллениаллар» — 3,7 соат сарфлайди. Бунинг натижасида одам қанчалик ёш бўлса, шунча кўп вақтини техникага сарфлайди, деган хулосага келинган.

Агарда инсоннинг ўртача умри ва ушбу кўрсаткич ўзгармаслиги ҳисобга олинса, «миллениаллар» умрининг 9 йилини смартфонларга сарфлайди. Таққослаш учун, инсон ўз умрининг узоқлигидан келиб чиқиб уйқу учун ўртача 15—30 йил сарфлайди.

Замонавий смартфонлар унинг эгаси ҳар куни экранга қанча вақт қарашини кўрсатиб беради — iOS ва Android созламаларида бунинг учун махсус пункт мавжуд.