Владивостокда 2 ҳафта аввал сотиб олинган машина устига 9 қаватли бино томидан бетон плита тушди. Машина устидаги қорни тозалаётган ҳайдовчи қочишга улгурди (видео)

Россиянинг Владивосток шаҳрида тўққиз қаватли уйнинг томидан бетон плита тўхтаб турган Nissan X-Trail машинаси устига қулаб тушди. Унинг эгаси машинага яқин бўлган, аммо жароҳат олмаган. Бу ҳақда Meduza хабар берди.

Ҳодиса 19 ноябрь куни эрталаб содир бўлди ва уйдаги кузатув камерасидан олинган видео ижтимоий тармоқларда тарқалди. Видеода эркак қандай қилиб машинани қордан тозалаётгани, кейин юқорига қараб қочиб кетгани акс этган. Бир сониядан сўнг машина устига бетон плита тушган.

Машинанинг эгаси, Александр исмли маҳаллий фуқаро «360» телеканалига «юқоридан шитирлаш»ни эшитгани учун қочишга муваффақ бўлганини айтган. Шунингдек, у машинани атиги икки ҳафта олдин сотиб олганини таъкидлаган. «Ҳали машинани расмийлаштиришга улгурмагандим. Машина қиммат, унинг учун 600 минг рубль бергандим. Мен унинг учун пул йиғгандим. Мен уни тартибга келтирдим, бамперни ўзгартирдим. Мен юрагимни ва қалбимни машинага тиккандим», — деди эркак. «Восток-Медиа»нинг ёзишича, эркак судга етказилган зарарни қоплаш талаби билан мурожаат қилмоқчи.

Ҳайдовчининг айтишича, воқеадан кейин интернет фойдаланувчилари унга янги машина учун оз миқдордаги пулларни ўтказишни бошлаган ва бир неча соат ичида бир неча минг рубль йиғилиб қолган. Эркак видео ёзиб, унда барчани қўллаб-қувватлагани учун миннатдорчилик билдирган. «Бўлган иш бўлди, мен тушкун эмас, қувноқман», — деди у.

Приморск ўлкаси прокуратураси ушбу ҳодиса юзасидан текширув бошлади. Дастлабки маълумотларга кўра, вентиляция шахтасининг пештоқи автомобиль устига тушган; идора плитанинг қулаб тушишига музлаган симлар уни тортиб қолгани сабаб бўлганини таъкидлаган.