Навоий вилояти Хатирчи туманида Nexia автомашинаси йўлдан ўтаётган велосипед ҳайдовчисини уриб юборган, дея хабар бермоқда ЙҲХББ.
Қайд этилишича, 2020 йил 16 ноябрь соат 19:30 ларда Навоий вилояти Хатирчи тумани «Мустақиллик» МФЙ ҳудудидан ўтган 4Р-48 давлат аҳамиятига эга бўлган автомобиль йўлининг 128-километрида йўл-транспорт ҳодисаси содир этилган.
Nexia русумли автомашинани Янгиработ–Зарафшон йўналиши бўйича бошқариб келаётган 26 ёшли ҳайдовчи ўзининг ҳаракат йўналиши бўйича йўлнинг чап томонидан ўнг томонига велосипедда кесиб ўтаётган 47 ёшли фуқарони уриб юборди.
Маълумотларга кўра, ҳодиса йўлнинг ёритилмаган қисмида содир этилган. Шу билан бирга, велосипед ҳайдовчиси спиртли ичимлик таъсирида бўлиб, йўлнинг белгиланмаган қисмини кесиб ўтган.
Ҳодиса оқибатида велосипед ҳайдовчиси вафот этган.
Ҳозирда ҳолат юзасидан Хатирчи тумани ИИБ ҳузуридаги Тергов бўлими томонидан дастлабки тергов ҳаракатлари олиб борилмоқда.
Аввалроқ Навоийда «Махсустранс» юк машинаси велосипедда кўчани кесиб ўтаётган 14 ёшли қизни уриб кетгани, Фарғона вилоятида велосипедчилар иштирокидаги ЙТҲлар кўпайгани туфайли велосипедлар ҳам жарима майдонига жойлаштирилаётгани ҳамда Навоийда содир бўлган ЙТҲда 62 ёшли велосипед ҳайдовчиси вафот этгани ҳақида хабар берилганди.
Изоҳ (0)