Toyota компанияси транспорт воситаси ҳаракатланаётган вақтда унга ёқилғи қуйиш ёки электр энергияси билан қувватлантириш имконини берадиган роботлаштирилган ҳайдовчисиз бошқарилувчи автомобилни яратиш устида иш олиб бормоқда. Ҳозирда лойиҳа патент кўринишида мавжуд, деб хабар беради Motor.

Дастлабки эскизларга кўра, ҳайдовчисиз бошқариладиган автоном транспорт воситасининг ишлаш принципи самолётларга ҳавода ёқилғи қуйиш технологиясига ўхшаб кетади. Авиацияда учувчилар самолёт парвоз қилаётган вақтда ҳам уни махсус насос ва шланглар ёрдамида ёқилғи билан тўлдира олади.

Роботлаштирилган ҳайдовчисиз бошқарилувчи автомобиль GPS-трекинг ёрдамида ёқилғи қуйиш шохобчасини аниқлайди. Ёқилғининг классик тури ёки электр энергияси билан тўлдиришда қандай техник ечимдан фойдаланилиши ҳозирча номаълум. Шу билан бирга, автоном дрон транспорт воситасига тўғри ҳаракат вақтида ёки тўхтаганда ёқилғи қуядими — буниси ҳам тушунарсиз.

Toyota муҳандислари жавоб бериши керак бўлган яна бир масала — ёқилғини қуйишда ҳайдовчи ҳам иштирок этадими, масалан, бензобак ёки электромобилнинг қувватлантириш портини очиб берадими? Афтидан, япон мутахассислари электрокарлар учун бирор ўтказгич яратишга ёки келажакдаги барча моделларни стандартлаштиришга мажбур бўлади.

Айни вақтда Toyota ҳайдовчисиз бошқариладиган лойиҳани патентлаган. Бироқ умумий фойдаланишдаги йўлларда автоном транспорт воситасидан фойдаланиш ҳамон кўплаб баҳс ва мунозараларга сабаб бўлмоқда, шу сабабли бу каби технологиянинг яқин кунларда пайдо бўлиши кутмаслик керак.