AQShda 17 yoshli o‘smir 3,4 million dollar turadigan noyob Pagani Huayra superkarida avariyaga uchradi, deb xabar beradi The Drive. Guvohlar yo‘l-transport hodisasini videoga olib, YouTube’da joylashtirgan.
Kadr: YouTube
Videodan ko‘rish mumkinki, noyob rodster avariyaga uchragan. To‘qnashuvdagi zarba kuchidan mashinaning old g‘ildiraklari, shuningdek, ikki eshigidan biri uzilib ketgan.
Ma’lumotlarga ko‘ra, ushbu mashina milliarder Tim Gillianga tegishli bo‘lib, avariya vaqtida u ham mashina ichida bo‘lgan. Superkarni esa uning 17 yoshli o‘g‘li Geyj Gillian boshqargan. O‘smir — YouTube-bloger bir necha bor shassi raqami 76029 bo‘lgan Pagani Huayra bilan maqtanib kelgan.
YTH oqibatida hech kimga jiddiy jarohat yetmagan. Biroq rodsterni aftidan qayta tiklab bo‘lmaydi. Gillianlar oilasining ushbu superkardan tashqari yana ko‘plab avtomobillari bor: McLaren Senna, Bugatti Chiron, Ferrari LaFerrari, Rolls-Royce Dawn va Lamborghini Urus.
Pagani Huayra hindularning shamol xudosi Kechua sharafiga nomlangan bo‘lib, unga 764 ot kuchiga ega 6,0 litrli V12 benzin agregati o‘rnatilgan. Dvigatel yetti pog‘onali uzatmalar qutisi yordamida boshqariladi. Rodsterning og‘irligi 1280 kilogrammni tashkil etadi.
Avvalroq britaniyalik teleboshlovchi ko‘rsatuv suratga olish jarayonida Lamborghini’da avariyaga uchragani to‘g‘risida xabar berilgandi.
