Наманган вилояти Поп туманида Lacetti автомашинаси бошқарувни йўқотиб Damas автомашинасига урилди, дея хабар қилмоқда ИИВ.
Маълум қилинишича, 15 ноябрь куни соат 04:00 ларда Пунгон–Наманган йўлининг 33-километрида Lacetti автомашинасини бошқариб кетаётган ҳайдовчи ҳаракат хавфсизлигини таъминлай олмаган.
Натижада шу йўналишда ўзидан олдинда йўлнинг ўнг томон қатнов қисмида тўхтаб турган Damas автомашинасини орқа томонига урилган.
Оқибатда, Damas автомашинасида бўлган ҳайдовчининг отаси тан жароҳати олиб шифохонада вафот этган.
Ушбу ҳолат бўйича туман ИИБ ҳузуридаги Тергов бўлинмаси томонидан 15 ноябрь куни Жиноят кодексининг 266-моддаси 2-қисми (одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Аввалроқ Фарғонада Spark дарахтга урилиши натижасида ҳайдовчи ва йўловчи вафот этгани, Сурхондарё вилояти Узун туманида содир бўлган ЙТҲ оқибатида 4 ёшли бола ҳаётдан кўз юмгани ҳамда Навоийда Nexia ҳайдовчиси 10 ёшли қиз ўлимига сабабчи бўлгани ҳақида хабар берилганди.
Изоҳ (0)