Коронавируснинг энг ноодатий хусусияти шундаки, у бошқа бир қатор вирусларнинг алоҳида хусусиятларини ўзида бирлаштирди. «РБК»нинг хабар беришича, бу ҳақда вирусолог, Россия Фанлар академияси аъзоси, биология фанлари доктори, Новосибирск давлат университети табиий фанлар факультети биотехнология ва вирусология лабораториясининг мудири, профессор Сергей Нетесов айтди.
«Энг ноодатийси, SARS-CoV-2’да илгари бошқа бир қатор вирусларда алоҳида-алоҳида учраган хусусиятлар бирлашди», — деган Нетесов «Lenta.ru»га берган интервьюсида.
Унинг сўзларига кўра, коронавирусга хос бўлган ситокин бўрони, яъни иммун тизими дизрегуляцияси Эбола вирусида ҳам кузатилади.
COVID-19 оқибатида юзага келадиган тромб ҳосил бўлиши ва қон қуюқлашиши, Эбола касаллиги, Конго-Қрим гемморагик иситмаси, денге иситмаси, шунингдек, буйрак етишмовчилиги синдромли гемморагик иситма касалликларида ҳам учрайди.
Нетесовнинг таъкидлашича, ҳид билишнинг йўқолиши ҳам коронавирус инфекциясининг ўзига хос хусусияти эмас. Унинг айтишича, камида 20 та бошқа вируслар ҳам худди шундай хусусиятга эга.
Аввалроқ вирусолог, тиббиёт фанлари доктори ва Россияда хизмат кўрсатган фан арбоби Анатолий Алцҳтейн коронавируснинг асосий симптомлари иситма, йўтал, томоқ оғриғи, ҳид ва таъм билишни йўқотиш эканлигини маълум қилганди. Шунингдек, бошқа симптомлар ҳам кузатилиши мумкинлигини, лекин асосий 5 та симптомлар бўлмаса қолганларига эътибор бермаса ҳам бўлишини айтган.
Изоҳ (0)