Ўзбекистон Қирғизистонга инсонпарварлик ёрдами сифатида 3 минг тонна буғдой жўнатди. Бу ҳақда «Ўзбекистон темир йўллари» хабар берди.
Компания томонидан маълум қилинишича, мазкур инсонпарварлик карвони Ўзбекистон Президентининг Қирғизистон халқига дўстона ёрдами йўлида ташкил этилган. 17 ноябрь куни 3 минг тонна буғдой ортилган поезд Андижон шаҳрининг «Андижон» темир йўл бекатига етиб келди. Поезд «Ўзбекистон темир йўллари» акциядорлик жамияти ҳамкорлигида Қирғизистоннинг Ўш шаҳрига йўл олади.
Эслатиб ўтамиз, Ўзбекистон ҳукумати 15 ноябрь куни махсус самолётда Қирғизистонга тиббий анжом ва дори-дармонлардан иборат инсонпарварлик ёрдами юборганди.
Аввалроқ Шавкат Мирзиёев телефон орқали Садир Жапаров билан стратегик шериклик муносабатларини муҳокама қилгани хабар қилинганди. Шу билан бирга, Шавкат Мирзиёев Ўзбекистон Қирғизистоннинг барқарор ривожланиш йўлидаги интилишини ҳар томонлама қўллаб-қувватлашини таъкидлаб ўтганди.
Маълумот учун, Ўзбекистон Қирғизистонга 2020 йилнинг апрель, май, июль ойларида ҳам инсонпарварлик ёрдами жўнатган. Шунингдек, Фарғона вилояти Қирғизистоннинг Боткен вилоятига инсонпарварлик ёрдами юборганди. Август ойида эса Ўзбекистон Қирғизистонга 560 минг долларлик инсонпарварлик ёрдами жўнатганди.
Изоҳ (0)