Жароҳатлар исканжасида қолган «Ливерпуль». Юрген Клоппнинг ҳақиқий имтиҳони ҳақида

«Ливерпуль» лазарети тўлишда давом этмоқда:

8 ноябрь, якшанба куни Шотландия нашрлари Эндрю Робертсоннинг жароҳати ҳақида хабар тарқатди: унинг оёқ сон қисми шикастланган. Шу боис у жамоасининг Словакияга қарши ўйин қайдномасига киритилмади. Шотландия терма жамоаси бош мураббийи Стив Кларкнинг сўзларига кўра, вазият унчалик жиддий эмас, бироқ Робертсоннинг бир-икки ҳафтани ўтказиб юбориши эҳтимоли бор.

13 ноябрь, жума куни Миср футбол федерацияси Муҳаммад Салоҳнинг коронавирусга чалингани ҳақида хабар берди. Қайд этилишича, Муҳаммадда касаллик аломатларсиз ўтмоқда.

Салоҳ бир неча кун олдин акасининг тўйи, шунингдек федерация томонидан ўтказилган тантанали зиёфатда қатнашган эди.

11 ноябрь, чоршанба куни Жо Гомес узоқ вақтга сафдан чиқди.

Бу Виржил ван Дейк билан бошланган марказий ҳимоячилар (ва у ерда ўйнаши мумкин бўлган футболчилар) жароҳати эпидемиясининг давоми эди.

Бунгача Жоэл Матип жароҳат олганди, шундан сўнг эса Жо Гомес билан жуфтликда ҳаракат қилган Фабиньо ҳам сафдан чиққанди.

Гомес эса бу вақтда захира ўйинчисидан (ўтган мавсумда у Матип билан ван Дейкка шерик бўлиш учун кураш олиб борарди) асосий таркибнинг ягона кучли ҳимоячисига айланганди. Унга эса ёш ва тажрибасиз Риз Уильямс (19 ёшли) ҳамда Нейт Филлипс (23 ёшли) ёрдам бераётганди. Матипнинг сафга қайтиши билан вазият озми, кўпми яхшиланганди, аммо жароҳатнинг кейинги қурбони айнан Жо Гомеснинг ўзи бўлди.

Гомес (яна) Англия терма жамоаси машғулотларида жароҳат олди. Эътиборга молик жиҳати, Жо Англия сафида атиги 12 та ўйин ўтказиб, 3 марта оғир жароҳат олган. У клубида жами 100 га яқин ўйинни айнан жароҳат сабаб ўтказиб юборган. У мазкур сабаб билан ҳатто 2018 йилги Жаҳон Чемпионатини ҳам ўтказиб юборганди.

«Мени энг кўп қайғуга солган нарса, унинг кучли оғриқдан азият чеккани бўлди. У жароҳат олганида атрофида ҳеч ким йўқ эди. Бу эса менга умуман ёқмади. Умид қиламанки, бу узоқ давом этмайди», – дейди Англия термаси устози Гарет Саутгейт.

Инглизлар дарвозабони Ник Поуп ҳам вазиятга шунга ўхшаш изоҳ берди: «Жо атрофида ҳеч ким йўқлигида жароҳат олди ва майсага йиқилди. Кўринишидан, у қаттиқ азоб чекаётганга ўхшарди. Жонинг бу ҳолатни бошдан кечираётганини ва азобланаётганини кўриш мен учун ҳам, бошқа йигитлар учун ҳам осон бўлмади».

12 ноябрь куни «қизиллар» матбуот хизмати футболчининг операция қилинганлигини эълон қилди. Жонинг бўғимларига зарар етган бўлса-да, у барибир мавсумнинг катта қисмини ўтказиб юборади.

Ҳозир мазкур ҳолатдан энг кўп афсусланаётганлардан бири Деян Ловрен бўлса керак. Боиси у айнан ўйин амалиётига эга бўлиш учун «Зенит»га ўтиб кетганди, ўшанда «Ливерпуль» уни сотишни истамаганди. Агар у бундай қарорга келмаганида балки, ҳозир асосий таркибдан жой олган бўлармиди.

Ҳозирда Клоппнинг ихтиёрида бор-йўғи 3 нафар соғлом марказий ҳимоячи бор: Матип (яқинда жароҳатидан фориғ бўлди), Филлипс ва 18 ёшли Сепп ван дер Берг (ҳали Премьер Лигада дебют қилмаган).

«Ливерпуль»нинг сафдан чиққан футболчилари:

– Виржил ван Дейк – тизза ости пайлари ёрилиши

Эҳтимолий тикланиш вақти: 2021 йил апрель

– Жо Гомес – тизза тўқималари шикастланиши

Эҳтимолий тикланиш вақти: 2021 йил баҳор

– Тиаго Алькантара – тизза жароҳати

Эҳтимолий тикланиш вақти: 2020 йил ноябрь

– Алекс Окслейд-Чемберлен – тизза жароҳати

Эҳтимолий тикланиш вақти: номаълум

– Трент Александер-Арнольд – болдир қисми шикастланиши

Эҳтимолий тикланиш вақти: 2020 йил декабрь

– Муҳаммад Салоҳ – COVID-19

Эҳтимолий тикланиш вақти: 2020 йил ноябрь декабрь

– Эндрю Робертсон – сон жароҳати

Эҳтимолий тикланиш вақти: номаълум

– Жордан Ҳендерсон – мушаклар жароҳати

Эҳтимолий тикланиш вақти: номаълум

Терма жамоалар ўйини олдидан, «Сити»га қарши ўйинда Трент мушакларини шикастлаб олганди.

17 ноябрь, душанба куни эса жамоа сардори Жордан Ҳендерсонниг сон мушакларини жароҳатлаб олгани маълум бўлди.

Умуман олганда, мавсум бошидан бери таркибнинг деярли ярми турли муаммоларга дуч келди:

Алекс Окслейд-Чемберлен мавсумолди йиғинлардан бери кўринмайди, у Австрияда тиззаси билан боғлиқ муаммога дуч келганди. Бироқ ҳали ҳам унинг тикланиш муддати ҳақида аниқ жавоб йўқ.

Тиаго Алькантара дастлаб, коронавирус билан касалланди, сўнгра эса жароҳат орттириб олди. Алькантара анчагина ўйинларни ўтказиб юборди: у сентябрь ойининг ўрталаридан бери майдонга тушгани йўқ. Катта эҳтимол билан у терма жамоалар ўйинидан кейин сафга қайтади.

Елкасидаги муаммолар туфайли Алиссон ҳам, тахминан, уч ҳафта давомида жамоага ёрдам бера олмаганди, Садио Мане, Наби Кейта ва Жердан Шакири эса коронавирус туфайли икки ҳафтадан «дам олди».

Матип ҳам жароҳатлар туфайли маълум вақт кўриниш бермади, Фабиньо ҳам аллақачон икки ҳафтани лазаретда ўтказиб бўлди, энди эса Трент, Гомес, Ҳендерсон. Ва, албатта, асосий йўқотиш – ван Дейк.

Бунинг устига Салоҳ ҳам коронавирусга чалинди. Бунгача Мане касалликни бошдан ўтказганди.

Ҳозирда бечора Клоппнинг аҳволига ҳавас қилиб бўлмайди. Чунки у учун ҳақиқий имтиҳон энди бошланади. Унинг бу вазиятдан қандай чиқиб кетишини эса вақт кўрсатади.