“Liverpul” lazareti to‘lishda davom etmoqda:
8-noyabr, yakshanba kuni Shotlandiya nashrlari Endryu Robertsonning jarohati haqida xabar tarqatdi: uning oyoq son qismi shikastlangan. Shu bois u jamoasining Slovakiyaga qarshi o‘yin qaydnomasiga kiritilmadi. Shotlandiya terma jamoasi bosh murabbiyi Stiv Klarkning so‘zlariga ko‘ra, vaziyat unchalik jiddiy emas, biroq Robertsonning bir-ikki haftani o‘tkazib yuborishi ehtimoli bor.
13-noyabr, juma kuni Misr futbol federatsiyasi Muhammad Salohning koronavirusga chalingani haqida xabar berdi. Qayd etilishicha, Muhammadda kasallik alomatlarsiz o‘tmoqda.
Saloh bir necha kun oldin akasining to‘yi, shuningdek federatsiya tomonidan o‘tkazilgan tantanali ziyofatda qatnashgan edi.
11-noyabr, chorshanba kuni Jo Gomes uzoq vaqtga safdan chiqdi.
Bu Virjil van Deyk bilan boshlangan markaziy himoyachilar (va u yerda o‘ynashi mumkin bo‘lgan futbolchilar) jarohati epidemiyasining davomi edi.
Bungacha Joel Matip jarohat olgandi, shundan so‘ng esa Jo Gomes bilan juftlikda harakat qilgan Fabinyo ham safdan chiqqandi.
Gomes esa bu vaqtda zaxira o‘yinchisidan (o‘tgan mavsumda u Matip bilan van Deykka sherik bo‘lish uchun kurash olib borardi) asosiy tarkibning yagona kuchli himoyachisiga aylangandi. Unga esa yosh va tajribasiz Riz Uilyams (19 yoshli) hamda Neyt Fillips (23 yoshli) yordam berayotgandi. Matipning safga qaytishi bilan vaziyat ozmi, ko‘pmi yaxshilangandi, ammo jarohatning keyingi qurboni aynan Jo Gomesning o‘zi bo‘ldi.
Gomes (yana) Angliya terma jamoasi mashg‘ulotlarida jarohat oldi. E’tiborga molik jihati, Jo Angliya safida atigi 12 ta o‘yin o‘tkazib, 3 marta og‘ir jarohat olgan. U klubida jami 100 ga yaqin o‘yinni aynan jarohat sabab o‘tkazib yuborgan. U mazkur sabab bilan hatto 2018-yilgi Jahon Chempionatini ham o‘tkazib yuborgandi.
“Meni eng ko‘p qayg‘uga solgan narsa, uning kuchli og‘riqdan aziyat chekkani bo‘ldi. U jarohat olganida atrofida hech kim yo‘q edi. Bu esa menga umuman yoqmadi. Umid qilamanki, bu uzoq davom etmaydi”, – deydi Angliya termasi ustozi Garet Sautgeyt.
Inglizlar darvozaboni Nik Poup ham vaziyatga shunga o‘xshash izoh berdi: “Jo atrofida hech kim yo‘qligida jarohat oldi va maysaga yiqildi. Ko‘rinishidan, u qattiq azob chekayotganga o‘xshardi. Joning bu holatni boshdan kechirayotganini va azoblanayotganini ko‘rish men uchun ham, boshqa yigitlar uchun ham oson bo‘lmadi”.
12-noyabr kuni “qizillar” matbuot xizmati futbolchining operatsiya qilinganligini e’lon qildi. Joning bo‘g‘imlariga zarar yetgan bo‘lsa-da, u baribir mavsumning katta qismini o‘tkazib yuboradi.
Hozir mazkur holatdan eng ko‘p afsuslanayotganlardan biri Deyan Lovren bo‘lsa kerak. Boisi u aynan o‘yin amaliyotiga ega bo‘lish uchun “Zenit”ga o‘tib ketgandi, o‘shanda “Liverpul” uni sotishni istamagandi. Agar u bunday qarorga kelmaganida balki, hozir asosiy tarkibdan joy olgan bo‘larmidi.
Hozirda Kloppning ixtiyorida bor-yo‘g‘i 3 nafar sog‘lom markaziy himoyachi bor: Matip (yaqinda jarohatidan forig‘ bo‘ldi), Fillips va 18 yoshli Sepp van der Berg (hali Premyer Ligada debyut qilmagan).
“Liverpul”ning safdan chiqqan futbolchilari:
– Virjil van Deyk – tizza osti paylari yorilishi
Ehtimoliy tiklanish vaqti: 2021-yil aprel
– Jo Gomes – tizza to‘qimalari shikastlanishi
Ehtimoliy tiklanish vaqti: 2021-yil bahor
– Tiago Alkantara – tizza jarohati
Ehtimoliy tiklanish vaqti: 2020-yil noyabr
– Aleks Oksleyd-Chemberlen – tizza jarohati
Ehtimoliy tiklanish vaqti: noma’lum
– Trent Aleksander-Arnold – boldir qismi shikastlanishi
Ehtimoliy tiklanish vaqti: 2020-yil dekabr
– Muhammad Saloh – COVID-19
Ehtimoliy tiklanish vaqti: 2020-yil noyabr-dekabr
– Endryu Robertson – son jarohati
Ehtimoliy tiklanish vaqti: noma’lum
– Jordan Henderson – mushaklar jarohati
Ehtimoliy tiklanish vaqti: noma’lum
Terma jamoalar o‘yini oldidan, “Siti”ga qarshi o‘yinda Trent mushaklarini shikastlab olgandi.
17-noyabr, dushanba kuni esa jamoa sardori Jordan Hendersonnig son mushaklarini jarohatlab olgani ma’lum bo‘ldi.
Umuman olganda, mavsum boshidan beri tarkibning deyarli yarmi turli muammolarga duch keldi:
Aleks Oksleyd-Chemberlen mavsumoldi yig‘inlardan beri ko‘rinmaydi, u Avstriyada tizzasi bilan bog‘liq muammoga duch kelgandi. Biroq hali ham uning tiklanish muddati haqida aniq javob yo‘q.
Tiago Alkantara dastlab, koronavirus bilan kasallandi, so‘ngra esa jarohat orttirib oldi. Alkantara anchagina o‘yinlarni o‘tkazib yubordi: u sentabr oyining o‘rtalaridan beri maydonga tushgani yo‘q. Katta ehtimol bilan u terma jamoalar o‘yinidan keyin safga qaytadi.
Yelkasidagi muammolar tufayli Alisson ham, taxminan, uch hafta davomida jamoaga yordam bera olmagandi, Sadio Mane, Nabi Keyta va Jerdan Shakiri esa koronavirus tufayli ikki haftadan “dam oldi”.
Matip ham jarohatlar tufayli ma’lum vaqt ko‘rinish bermadi, Fabinyo ham allaqachon ikki haftani lazaretda o‘tkazib bo‘ldi, endi esa Trent, Gomes, Henderson. Va, albatta, asosiy yo‘qotish – van Deyk.
Buning ustiga Saloh ham koronavirusga chalindi. Bungacha Mane kasallikni boshdan o‘tkazgandi.
Hozirda bechora Kloppning ahvoliga havas qilib bo‘lmaydi. Chunki u uchun haqiqiy imtihon endi boshlanadi. Uning bu vaziyatdan qanday chiqib ketishini esa vaqt ko‘rsatadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)