Арманистон ташқи ишлар вазири Зограб Мнацаканян истеъфога чиқди. Мнацаканяннинг бош вазир Никол Пашинян номига ёзган аризасини Арманистон Ташқи ишлар вазирлиги матбуот котиби Анна Нагдалян Facebook’да эълон қилди, деб ёзмоқда Meduza.
Sputnik агентлиги хабарига кўра, бундан олдин Пашинян Арманистон парламентида сўзга чиққан пайтда ташқи ишлар вазирини ишдан бўшатиш нияти борлигини маълум қилган.
Бош вазирнинг сўзларига кўра, «2018 йилгача шаклланган музокаралар жараёни Тоғли Қорабоғ ҳудудларини Озарбайжонга қайтариб беришга олиб келди». Хусусан, Пашиняннинг айтишича, Шуша шаҳрини Озарбайжонга топшириш масаласи кўтарилган.
Арманистон Ташқи ишлар вазирлиги ушбу айбловни рад этди. Нагдалян Шуша шаҳрини Озарбайжонга ўтказиш масаласи Қорабоғ можаросини ҳал қилиш бўйича музокараларнинг ҳеч қайси босқичида муҳокама қилинмаганлигини айтди.
Арманистонда 10 ноябрдан бери Тоғли Қорабоғдаги урушни тугатиш тўғрисидаги битим имзолангани сабабли сиёсий инқироз давом этмоқда. Ушбу келишув шартларига кўра, Озарбайжон тан олинмаган республиканинг катта ҳудудларини ўз назорати остига олди. Ереванда Никол Пашиняннинг истеъфосини талаб қиладиган оммавий митинглар ўтказилмоқда.
Изоҳ (0)