Италияда 2019 йил сентябрида олинган қон намуналарида коронавирусга қарши антитаналар топилди, деб хабар бермоқда «Интерфакс». Бу SARS-Cоv-2 коронавируси мамлакатда ўша вақтдаёқ тарқалганидан далолат беради.
«Биз 2019 йил сентябрь ва 2020 йил март оралиғида ўпкаси скрининг қилинган 959 кишидан олинган қон намуналарида таҳлил ўтказдик ва антитаналарни ўрганиб чиқдик. Қон намунаси олинган 959 кишининг 111 нафарида SARS-Cоv-2 RBD антитаналари аниқланди (11,6 фоиз)», — дейилади Милан онкология институти ва Сиена университети ҳисоботида.
Тадқиқот энг кўп ҳолатлар Ломбардия, Пьемонт, Лацио, Эмилия-Романья, Тоскана ва Венетода бўлганини кўрсатган. Бу COVID-19’нинг симптомсиз ҳолатлари Италияда «биринчи бемор» расман қайд этилишидан анча аввал бошланганидан далолат беради.
Миландаги «Луижи Сакко» юқумли касалликлар клиникаси директори Массимо Гали эса вируснинг 2019 йил сентябрда пайдо бўлганига шубҳа билдирди: нима учун касалликнинг биринчи ўчоқлари дарҳол пайдо бўлмади?
Расмий маълумотларга кўра, янги коронавирус 2019 йил декабрда Хитойнинг Ухань шаҳридан тарқала бошлаган деб ҳисобланади. Европада коронавирус билан касалланишнинг дастлабки ҳолатлари январь ойида қайд этилган.
Изоҳ (0)