АҚШнинг Moderna компанияси унинг коронавирусга қарши вакцинаси синовларнинг учинчи босқичида 94,5 фоиз самарадорлик кўрсатганини эълон қилди. Бу ҳақда Meduza хабар берди.
Компания томонидан маълум қилинишича, синовларнинг учинчи босқичи 30 минг кишида амалга оширилган. Вакцинанинг иккинчи дозаси қабул қилинганидан икки ҳафта ўтгач, тадқиқот иштирокчиларининг 95 нафари коронавирус билан касалланган, уларнинг 90 нафари плацебо ва беш нафари вакцина қабул қилган.
Moderna томонидан яратилган вакцина mRNA-1273 номини олган. Бу вакцина ахборот ташувчи РНК асосида яратилган бўлиб, вирусли S-оқсиллар рибонуклеин кислота томонидан ишлаб чиқарилади. Мазкур вакцина ишлаш механизми бўйича Pfizer ва BioNTech компаниялари томонидан яратилган вакцинага ўхшайди.
Аввалроқ Pfizer ва BioNTech компаниялари улар томонидан яратилган коронавирусга қарши вакцина самарадорлиги клиник синовларнинг учинчи босқичида 90 фоизни ташкил этганини маълум қилганди. Россияда яратилган «Спутник V» вакцинасининг самарадорлиги эса 92 фоизга баҳоланмоқда.
Изоҳ (0)