Сурхондарё вилояти Узун туманида содир бўлган ЙТҲ оқибатида 4 ёшли бола ҳаётдан кўз юмди

Сурхондарё вилояти Узун туманида 2020 йил 11 ноябрь куни содир этилган йўл-транспорт ҳодисаси оқибатида тўхтаб турган Nexia’дан тушган 4 ёшли бола ҳалок бўлди. Бу ҳақда Сурхондарё вилояти ИИБ ЙҲХБ ахборот хизмати хабар қилган.

ЙҲХББнинг Telegram-каналида эълон қилинган видеолавҳада ЙТҲ тафсилотлари ва автоҳалокатга сабаб бўлган омиллар таҳлил қилинган.

Хабарга кўра, Узун тумани «Кичик жончека» маҳалласи ҳудудидан ўтган Р-4-101 автомобиль йўлида қарама-қарши йўналишида тескари тарзда ўзига қараб келаётган Nexia’га чироқларини ёқиб турган бошқа бир Nexia’дан тушган 4 ёшли бола ЙТҲ қурбонига айланган. Nexia ҳайдовчисининг сўзларига кўра, тескари турган автомобиль чироқлари кўзини қамаштирган ва тўғридан келаётган юк машинасидан олиб қочиб йўл четига чиқиб ўтиб кетмоқчи бўлган вақтида болакай ва унинг онасини уриб юборган.

Ҳалок бўлган боланинг 12 ёшли акаси воқеага бевосита гувоҳ бўлган, унинг айтишича, ҳайдовчи воқеадан кейин машинасининг давлат рақамларини ечиб олиб, ҳодиса жойидан кетиб қолган.

Тўхтаб турган Nexia ҳайдовчисининг берган кўрсатмалари бўйича, келаётган Nexia ҳайдовчиси тезликни камайтирмаган. Ҳодиса айбдори эса тўхтаб турган машинанинг узоқни ёритувчи чироқлари ёқилганлиги, тўғридан юк машинаси ўз йўлида келаётгани туфайли тезкор қарор қабул қилиб ўнг томондан ўтиб кетишга уринганини билдирган.

ЙТҲдан кейин икки ҳайдовчи уришиб кетган ва йўлда беҳуш ҳолда, эҳтимол, ўлиб ётган болакайга парво ҳам қилмаган.

Узун тумани йўллардан фойдаланиш унитар корхонаси директори Алижон Худойқулов автомобиль трассасининг ёритиш чироқларига эга эмаслиги, йўлларда ётиқ чизиқлар ўчиб кетгани, аҳоли хонадонларининг йўлларга қум ёки ғўзапоя тўкиб қўйгани юзасидан изоҳ бера олмаган. Камчиликлар 10 кун муддат ичида бартараф қилинишини ваъда қилган.

«Кичик жончека» маҳалласи раиси Абдуқодир Абдиев хонадонларнинг йўлларга қум, шағал ёки ғўзапоя тўкиб қўйгани юзасидан аҳоли орасида тушунтириш ишлари ўтказилишини билдирган.

Шунингдек, видеолавҳада йўлдаги носозликларни бартараф этилишига масъул бошқа идоралар, жумладан, туман Ободонлаштириш бошқармаси, Электр тармоқлари корхонасининг масъуллари ҳам камчиликлар бартараф қилинишини маълум қилган.

Терговчи Сирожиддин Ҳусанов ҳодиса юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши очилганини қайд этган.

Сурхондарёда одам ўлимига сабаб бўлган ЙТҲлар тез-тез содир бўлиб туради, жумладан, 3 октябрда Жарқўрғон тумани, «Оқтепа» маҳалласи ҳудудидан ўтувчи М-41 автомобиль йўлида Nexia автобус билан тўқнашиши оқибатида 21 ёшли ҳайдовчи ва машина ичидаги йўловчи вафот этган.

13 октябрда Бойсун туманида Lacetti ва Cobalt иштирокида содир бўлган ЙТҲда икки киши ҳалок бўлган. 2 ноябрда Сариосиё туманида Nexia йўлдан ўтаётган 9 ёшли болани уриб юборган, жабрланувчи шифохонадан ҳаётдан кўз юмган.