Бортида тўрт нафар астронавт бўлган Falcon 9 узаткич-ракетаси Crew Dragon кемаси билан Флоридада жойлашган Кеннеди Космик маркази майдончасидан Халқаро космик станция томон учирилди. Ракетанинг учирилиш трансляцияси NASA’нинг YouTube каналида амалга оширилган.
Бу Crew Dragon’нинг ичида астронавтлар бўлган иккинчи ва NASA билан SpaceX’нинг шартномаси доирасидаги биринчи парвози ҳисобланади.
NASA 10 ноябрь куни астронавтларни SpaceX томонидан яратилган тизимда Халқаро космик кемасига етказиш ва қайта олиб келишни сертификациядан ўтказганини эълон қилганди.
Crew Dragon’нинг ХКСга муваффақиятли учирилгани билан АҚШнинг амалдаги президенти Дональд Трамп ва сайловларда етакчилик қилаётган Жо Байден SpaceX ва NASA’ни табриклаган.
«Ажойиб учириш! Биз бу билан шуғулланишни бошлаганимизда NASA фалокат ёқасида эди. Ҳозир яна дунёдаги энг ‘қайноқ’, энг илғор космик марказ, барчадан олдинда!», — деб ёзади Трамп ўзининг Twitter’даги саҳифасига.
Ўз навбатида Байден Crew Dragon’нинг учирилиши — «бу илм-фаннинг кучи, инновациялар, ихтиролар ва қатъият билан нималарга эришиш мумкинлигининг исботи ҳисобланиши»ни таъкидлаган.
Эслатиб ўтамиз, Илон Маскнинг SpaceX компанияси томонидан яратилган Crew Dragon космик кемаси 30 май куни Халқаро космик станция томон учирилган эди. 31 май куни эса Crew Dragon ХКСга муваффақиятли туташган ва 3 август куни Ерга муваффақиятли қўнганди.
Изоҳ (0)