Bortida to‘rt nafar astronavt bo‘lgan Falcon 9 uzatkich-raketasi Crew Dragon kemasi bilan Floridada joylashgan Kennedi Kosmik markazi maydonchasidan Xalqaro kosmik stansiya tomon uchirildi. Raketaning uchirilish translyatsiyasi NASA’ning YouTube kanalida amalga oshirilgan.
Bu Crew Dragon’ning ichida astronavtlar bo‘lgan ikkinchi va NASA bilan SpaceX’ning shartnomasi doirasidagi birinchi parvozi hisoblanadi.
NASA 10-noyabr kuni astronavtlarni SpaceX tomonidan yaratilgan tizimda Xalqaro kosmik kemasiga yetkazish va qayta olib kelishni sertifikatsiyadan o‘tkazganini e’lon qilgandi.
Crew Dragon’ning XKSga muvaffaqiyatli uchirilgani bilan AQShning amaldagi prezidenti Donald Tramp va saylovlarda yetakchilik qilayotgan Jo Bayden SpaceX va NASA’ni tabriklagan.
“Ajoyib uchirish! Biz bu bilan shug‘ullanishni boshlaganimizda NASA falokat yoqasida edi. Hozir yana dunyodagi eng ‘qaynoq’, eng ilg‘or kosmik markaz, barchadan oldinda!”, — deb yozadi Tramp o‘zining Twitter’dagi sahifasiga.
O‘z navbatida Bayden Crew Dragon’ning uchirilishi — “bu ilm-fanning kuchi, innovatsiyalar, ixtirolar va qat’iyat bilan nimalarga erishish mumkinligining isboti hisoblanishi”ni ta’kidlagan.
Eslatib o‘tamiz, Ilon Maskning SpaceX kompaniyasi tomonidan yaratilgan Crew Dragon kosmik kemasi 30-may kuni Xalqaro kosmik stansiya tomon uchirilgan edi. 31-may kuni esa Crew Dragon XKSga muvaffaqiyatli tutashgan va 3-avgust kuni Yerga muvaffaqiyatli qo‘ngandi.
Izoh (0)