«Уй олгач, менга хат ёзишни унутмагин». Шавкат Мирзиёев имтиёз асосида бюджетга ўқишга кирган талаба келинга уй совға қилди

Ўзбекистон Президенти 2020 йилнинг 12—13 ноябрь кунлари Қашқадарё вилоятига қилган ташрифи давомида қашқадарёлик ёшлар билан ҳам учрашди. Мулоқот мобайнида давлат раҳбари Қарши давлат университети талабаси Шоҳида Жўраевага 2 хонали уй совға қилинишини таъкидлаган.

«Дарё» мухбири Миролим Исажоновнинг хабар беришича, 12 ноябрь куни Шавкат Мирзиёев Қарши шаҳридаги Ёшлар марказида бир гуруҳ йигит-қизлар билан учрашиб, ёшлар муаммоларини ҳал қилиш, бандлигини таъминлаш, бўш вақтини мазмунли ташкил этиш бўйича очиқ мулоқот ўтказган. Учрашувда Шоҳида Жўраева «Ёш психологлар» марказини ташкил этиш таклифини билдирган.

«Мамлакатимиз раҳбарининг айнан Қашқадарё вилоятига ташрифи, янги бунёд этилган Ёшлар марказини тақдим этиши ва биз билан мулоқот қилиши қашқадарёлик ёшларга жуда катта куч, қувонч бағишлади. Ушбу йиғилишда Президентимизга ёшлар, ёш оиларнинг психологик маданиятини ошириш, уларни катта ҳаётга тарбиялаш мақсадида «Ёш психологлар» марказини ташкил этиш таклифи билан мурожаат қилдим. Ушбу таклиф давлатимиз раҳбарига маъқул келди», — деди 25 яшар талаба.

Давлат раҳбари Шоҳида Жўраеванинг таклифини эшитгач, унга Қарши шаҳридан 2 хонали уй совға қилинишини айтган.

«Турмуш қурганимизга энди йигирма кун бўлди. Президентимиз ёш оила эканлигим боис таклифимдан келиб чиққан ҳолда шу ернинг ўзида 2 хонали уйлардан бирини совға тариқасида тақдим қилди. Бу эса мени чексиз қувонтирди. Оилам билан туманда турамиз, олийгоҳимиз эса шаҳарда жойлашган. Ўқишга қатнаш менга қийинчилик туғдирарди. Бизда шаҳар марказидан уй олиш нияти бор эди ва бу ният Президентимиз билан ўтган учрашувда амалга ошди. Давлат раҳбари ‘Уйинг қайси қаватда бўлишини хоҳласанг ўзинг танла’. Уйни олганингдан кейин ‘Мана шу уйни олдим, деб менга хат ёзишни унутмагин’, деб таъкидлади. Мен эса уйни иккинчи қаватдан танлашни ният қилдим», — деди у.

Шоҳида Жўраеванинг айтишича, у кириш имтиҳонларисиз давлат гранти асосида талабалик бахтига эришган.

«Коллежни битирганимдан сўнг ёшлар етакчиси вазифасида иш бошлаганман. Айнан ёшлар ташкилотида катта бўлганман, десам адашмайман. «Энг ёш ёшлар етакчиси» номинацияси бўйича «Ўзбекистон мустақиллигининг 25 йиллиги» кўкрак нишони билан тақдирланганман. Шу йили Ўзбекистон ёшлар иттифоқи тавсияномасига кўра, кириш имтиҳонларисиз давлат гранти асосида Қарши давлат университетининг хорижий тиллар факультети филология ва тилларни ўқитиш (инглиз тили) таълим йўналишига ўқишга қабул қилиндим»,  — деди Шоҳида Жўраева.

Эслатиб ўтамиз, давлат раҳбари билан кечган учрашувда, шунингдек, яқинда Сербияда ўтган самбо бўйича жаҳон чемпионатида олтин медални қўлга киритган Ўзбекистон давлат жисмоний тарбия институтида контаркт асосида ўқиб келаётган яккабоғлик Мушарраф Ибодуллаева давлат гранти асосида ўқишини давом эттирадиган бўлганди.