Ўзбекистонга АҚШдан 16 нафар инглиз тили ўқитувчиси ҳамда мамлакатнинг етакчи университетлари профессорлари келиши кутилмоқда. Бу ҳақда Халқ таълими вазирлигининг ахборот хизмати хабар қилган.
Хабарга кўра, Халқ таълими вазирлигида Шерзод Шерматов ҳамда АҚШнинг Ўзбекистондаги фавқулодда ва мухтор элчиси Дениел Розенблюм ўртасида учрашув бўлиб ўтган.
Унда «Онлайн мактаб» лойиҳаси доирасида Американинг маданият бўйича атташеси мактаб ўқувчилари учун инглиз тили дарсларини ўқитишни бошлагани, бу каби амалиётлар ўқувчилар чет эллик мутахассислардан инглиз тилини ўрганиш йўлида имконият эканлиги қайд этилган.
«Америкалик мутахассис томонидан олиб бориладиган дарслар ўқувчиларга инглиз тилини ўрганишда оддий ва самарали тил ўрганиш усулларидан фойдаланишда ёрдам беради. Яқин ойларда АҚШдан яна 16 нафар инглиз тили ўқитувчиси ҳамда АҚШнинг етакчи университетларининг профессорлари (PhD) келиши ва халқ таълими ходимларини қайта тайёрлаш ва уларнинг малакасини ошириш ҳудудий марказларини қўллаб-қувватлаши кутилмоқда», — дейилади вазирлик баёнотида.
Халқ таълими вазирлиги Америка Кенгашлари билан биргаликда Қарши шаҳридаги «Баркамол авлод» болалар марказида «Америкага дарча» (American window) кутубхонасини биргаликда очиш масаласи устида иш олиб бораётганлигини маълум қилди.
«Америкага дарча» болалар, ёшлар, ўқитувчи ва бошқалар учун ахборот-ресурс маркази бўлиб, инглиз тилини ўрганиш бўйича юқори сифатли материаллар билан танишиш, STEM ва робототехника курслари, суҳбат клублари ва шу каби бошқа йўналишлар билан танишиш имконини беради. Қарши шаҳрида жойлашадиган ушбу марказ Марказий Осиёдаги энг йирик марказ бўлиши кутилмоқда.
Шунингдек, учрашувда томонлар АҚШнинг етакчи университетларида мактаб ўқувчилари ва ёшларни ўқитиш бўйича мавжуд ҳамкорликни кенгайтириш бўйича фикр алмашган.
Изоҳ (0)