АҚШ президенти Дональд Трамп биринчи бор сайлов якунлари бўйича шакллантириладиган кейинги администрацияга ўзи раҳбарлик қилмаслиги мумкинлигини айтди, деб хабар беради «Коммерсантъ». Пандемияга қарши кураш борасида амалга оширилаётган ишлар ҳақида гапирар экан, у кейинги администрация қанақа бўлишини «вақт кўрсатади» деган.
«Идеал ҳолатда биз изоляцияга кирмаймиз. Мен кирмайман, ҳозирги администрация изоляцияга кирмайди. Келажакда ҳам содир бўлмаслигига умид қиламан — кейинги администрация қанақа бўлишини ким билади? Ўйлайманки, вақт кўрсатади. Аммо мен шуни айта оламан, ҳозирги администрация изоляцияга кирмайди», — дейди Трамп Оқ уйда журналистлар билан ўтказилган брифингда. Reuters’нинг ёзишича, бу Дональд Трамп президент бўлмаслиги эҳтимолини тилга олган биринчи ҳолат ҳисобланади.
Эслатиб ўтамиз, АҚШ оммавий ахборот воситалари, хусусан, Associated Press, CNN, The New York Times, ABC News, Fox News ва бошқалар 7 ноябрь куни Жо Байденни АҚШнинг сайланган президенти деб эълон қилди. Президент сайлови 3 ноябрь куни ўтиб бўлган, аммо уларнинг якуний натижалари почта орқали овоз берилганлиги ва сайловга рекорд даражада кўп (аввалги йиллардагидан 15 миллионга кўп) сайловчилар келганлиги туфайли кечикди. Байден президент сайловида ғолиб чиқиш учун танловчиларнинг камида 270 та овози керак бўлган ҳолатда 273 та овозни қўлга киритган.
АҚШнинг амалдаги президенти Дональд Трамп эса ҳозирча мағлубиятини тан олишдан бош тортди. Танловчилар ҳайъати президентни расман 14 декабрь куни сайлайди.
Изоҳ (0)