АҚШда ўтган бир сутка ичида коронавирусга чалинганлар сони бўйича рекорд кўрсаткич қайд этилди. Бу ҳақда Жонс Ҳопкинс университети маълумотларига таяниб, «РБК» хабар берди.
13 ноябрь куни 160 мингдан ортиқ касалланиш ҳолати кузатилган бўлиб, бутун мамлакатда COVID-19’га чалинганлар сони 10,7 миллион кишидан ошган. Ҳозирга қадар 244,2 минг бемор коронавирус қурбонига айланган. АҚШ Касалликлар назорати ва профилактикаси марказининг прогнозларига кўра, декабрь бошига бориб, мамлакатдаги COVID-19 қурбонлари сони 282 минг кишига етиши мумкин.
COVID Tracking Project ресурси маълумотларига кўра, 13 ноябрь куни АҚШда 68 516 киши коронавирус инфекцияси ташхиси билан касалхонага ётқизилган, бу эса инфекция тарқалишни бошлаганидан буён қайд этилган энг юқори кўрсаткич ҳисобланади. Бир ҳафта ичида шифохонага ётқизилганларнинг ўртача сони 20,01 фоизга ошган.
АҚШда бир кун аввал ҳам суткалик антирекорд қайд этилган, янги коронавирусга чалиниш бўйича тасдиқланган ҳолатлар бир кеча-кундузда пандемия бошидан буён рекорд даража — 156 526 нафарни ташкил қилган эди.
Изоҳ (0)