Microsoft компанияси Россия ҳамда Шимолий Корея ҳукуматларида ишловчи хакерлар COVID-19’га қарши вакцина ишлаб чиқаётган еттита ташкилотга ҳужум уюштирган деб ҳисобламоқда. Бу ҳақда Reuters хабар қилган.
Microsoft маълумотларига кўра Fancy Bear (тахмин қилишларича, бош разведка бошқармасига ишлайдиган гуруҳ) фармацевтик компанияларнинг тармоқларига киришга уринган. Microsoft’нинг қайд этишича, гуруҳ Шимолий Кореянинг Zinc ва Cerium жамоалари билан биргаликда ҳаракат қилган.
Ҳужумлар Канада, Франция, Ҳиндистон, Жанубий Корея ва АҚШ фирмаларига уюштирилган. Уларнинг аксар қисми муваффақиятсиз якун топган, бироқ айримлари тармоққа киришни уддалаган.
Microsoft ҳужумлар мақсади нимадан иборат экани, аниқ хронология ёки ҳужумлар тавсифини ошкор этмаган, дейилади Reuters хабарида.
2020 йил октябрь охирида ФҚБ АҚШ соғлиқни сақлаш тизимига хакерлар ҳужумларининг сони кескин ортиб бораётгани ҳақида огоҳлантирган. АҚШ идорасининг маълумотларига кўра хакерлар ҳужумларининг асосий мақсади ахборот учун пул талаб қилишдан иборат. Бу каби ҳужумларда хакерлар компьютерларни блоклайди ва ўлжа товон пули тўлаганидан кейин уни очиб бериши мумкинлигини айтади.
Мавзуга доир: Беларуслик хакерлар Александр Лукашенко режимига «умумий ҳужум» амалга оширилишини маълум қилди
АҚШнинг турли штатларидаги UHS мутахассислари BleepingComputer нашрига интервью бериб компьютерлар мониторида тизимга қайта кириш учун катта маблағ бериш таклиф этилганини билдирган.
Дюссельдорфда сентябрь ўрталарида худди шунга ўхшаш ҳужум оқибатида шаҳар клиникаси IТ-тизимларига киришда бир ҳафта давомида муаммолар кузатилган. Тиббиёт ходимлари режалаштирилган операцияларни кечиктирган, тез тиббий ёрдамга муҳтож беморлар бошқа клиникаларга юборилган. Бемор аёллардан бирини бошқа шаҳардаги шифохонага юборишган, аёлга бир соат ичида тегишли ёрдам кўрсатилмагани туфайли бемор вафот этган.
Аввал Европа иттифоқи бундестаг ва Ангела Меркелга киберҳужум қилгани учун бош разведка бошқармаси раҳбари ва Россия ҳарбий разведкасининг бўлинмаси – Fancy Bear’га нисбатан санкциялар қўллаганди.
Изоҳ (0)