Microsoft kompaniyasi Rossiya hamda Shimoliy Koreya hukumatlarida ishlovchi xakerlar COVID-19’ga qarshi vaksina ishlab chiqayotgan yettita tashkilotga hujum uyushtirgan deb hisoblamoqda. Bu haqda Reuters xabar qilgan.
Microsoft ma’lumotlariga ko‘ra Fancy Bear (taxmin qilishlaricha, bosh razvedka boshqarmasiga ishlaydigan guruh) farmatsevtik kompaniyalarning tarmoqlariga kirishga uringan. Microsoft’ning qayd etishicha, guruh Shimoliy Koreyaning Zinc va Cerium jamoalari bilan birgalikda harakat qilgan.
Hujumlar Kanada, Fransiya, Hindiston, Janubiy Koreya va AQSh firmalariga uyushtirilgan. Ularning aksar qismi muvaffaqiyatsiz yakun topgan, biroq ayrimlari tarmoqqa kirishni uddalagan.
Microsoft hujumlar maqsadi nimadan iborat ekani, aniq xronologiya yoki hujumlar tavsifini oshkor etmagan, deyiladi Reuters xabarida.
2020-yil oktabr oxirida FQB AQSh sog‘liqni saqlash tizimiga xakerlar hujumlarining soni keskin ortib borayotgani haqida ogohlantirgan. AQSh idorasining ma’lumotlariga ko‘ra xakerlar hujumlarining asosiy maqsadi axborot uchun pul talab qilishdan iborat. Bu kabi hujumlarda xakerlar kompyuterlarni bloklaydi va o‘lja tovon puli to‘laganidan keyin uni ochib berishi mumkinligini aytadi.
Mavzuga doir: Belaruslik xakerlar Aleksandr Lukashenko rejimiga “umumiy hujum” amalga oshirilishini ma’lum qildi
AQShning turli shtatlaridagi UHS mutaxassislari BleepingComputer nashriga intervyu berib kompyuterlar monitorida tizimga qayta kirish uchun katta mablag‘ berish taklif etilganini bildirgan.
Dyusseldorfda sentabr o‘rtalarida xuddi shunga o‘xshash hujum oqibatida shahar klinikasi IT-tizimlariga kirishda bir hafta davomida muammolar kuzatilgan. Tibbiyot xodimlari rejalashtirilgan operatsiyalarni kechiktirgan, tez tibbiy yordamga muhtoj bemorlar boshqa klinikalarga yuborilgan. Bemor ayollardan birini boshqa shahardagi shifoxonaga yuborishgan, ayolga bir soat ichida tegishli yordam ko‘rsatilmagani tufayli bemor vafot etgan.
Avval Yevropa ittifoqi bundestag va Angela Merkelga kiberhujum qilgani uchun bosh razvedka boshqarmasi rahbari va Rossiya harbiy razvedkasining bo‘linmasi – Fancy Bear’ga nisbatan sanksiyalar qo‘llagandi.
Izoh (0)