BMW компанияси Sports Activity Vehicle (SAV) сегментига кирувчи ва дизайн, электрификация ҳамда автоном бошқарув соҳасидаги сўнгги ютуқлар билан жиҳозланган iХ электрокроссоверини тақдим этди. Мазкур моделни ишлаб чиқариш Дингольфингдаги заводда 2021 йилнинг иккинчи яримидан бошланади, деб хабар беради Motor.
Серияли электрокроссовер узунлиги ва эни бўйича BMW X5 билан, баландлиги бўйича Х6’га тенг, ўқлари орасидаги масофа уч метр. iХ суриладиган эшик тутқичлари, ҳошиясиз ён эшиклар ва кузовнинг орқасини тўлиқ эгаллаган юкхона эшигига эга. Бундан ташқари, ўзига хос дизайн ҳам мавжуд — шу вақтга қадар BMW автомобилларига ўрнатилган энг ингичка фаралар (ёруғлик диодли базавий ва лазерли — қўшимча ҳақ эвазига), шунингдек, камералар, радарлар ва бошқа датчиклар билан интеграциялашган анъанавий радиатор панжараси ўрнидаги панел.
BMW’нинг маълум қилишича, полиуретан билан қоплангани ҳисобига майда қирилган жойлар ўз-ўзидан йўқолиб кетишга қодир — 24 соат давомида хона ҳарорати ва беш дақиқа иссиқ ҳаво оқими сабаб.
Электрокар 500 от кучига эга иккита мотор ёрдамида ҳаракатга келиб, соатига 100 километр тезликка беш сониядан камроқ вақт ичида эришади. Автомобиль ишлаб чиқарувчининг сўзларига кўра, «100 киловатт-соатдан ошадиган» батареялар сиғими сабаб iX бир марта қувватланиш орқали WLTP цикли бўйича 600 километрдан ортиқ йўл боса олади.
Оддий тармоқдан 100 фоизли қувватланиш учун 11 соат керак бўлади. Бироқ бошқа тезкор вариант ҳам инобатга олинган: 200 кВт қувватга эга ўзгармасдан токдан 80 фоизга энергия захирасини 40 дақиқада олиш мумкин, 120 километрга етадиган масофа учун — 10 дақиқа кифоя қилади.
iХ— янги автоном бошқарув функциясига эга бўлган Бавария маркасининг биринчи модели. Бундан ташқари, у 5G алоқа тармоғини қўллаб-қувватлайди, автомобилнинг ҳисоб қуввати даражаси эса бошқа BMW’ларга қараганда икки баробар кўпроқ маълумотларни қайта ишлаш имконини беради.
iХ’нинг бошқа хусусиятлари ҳам бор, масалан, олд ойнани ювишга мўлжалланган қурилма, капот остига беркитилган логотип ва орқани кўришга мўлжалланган камера. Олд панелни деярли тўлиқ 12,3 ёки 14,9 дюймли эгилган мултимедиа панели эгаллаган.
Моделнинг базавий жамланмасидан 12 та динамика ва 205 ваттли кучайтиргич, 18 та динамикка эга Harman/Kardon тизими ўрин олган. Бунга муқобил сифатида қуввати 1615 ваттга тенг 30 динамикали Bowers & Wilking Surround Sound аудиотизимидан фойдаланиш мумкин. Шунингдек, базавий версия 20 дюймли дискалар билан жиҳозланган, 21 ва 22 дюймли Аir Performance Wheels ғилдираклари оддий ғилдираклардан 15 фоизга енгил бўлиб, улар учун қўшимга ҳақ тўлаш керак.
Изоҳ (0)