Қозоғистонга ёғган қор сабаб Нур-Султонда бир кунда — 100 та, Олмаотада эса бир кечада 39 та ЙТҲ содир бўлди

Қозоғистон пойтахти Нур-Султонда кучли қор ёғиши оқибатида йўл-транспорт ҳодисалари сони ортиб кетди. Полиция автомобиль эгаларига илтимос билан мурожаат қилди, деб хабар беради Tengrinews.

«Кучли қор ёғиши ва музламалар юзага келгани сабаб коммунал хизматларнинг махсус техникалари максимал даражада шаҳар кўчаларини тозалашга жалб этилган. Пойтахт аҳолисидан вазиятга тушуниб, техникалар колоннасига ҳамроҳлик қилаётган полиция патруллари талабларини бажаришларини, йўлнинг ҳаракат қисмига транспорт воситаларини қўйиб кетиб, тозалайдиган техникаларга халақит қилмасликни, шунингдек, махсус техникалар йўлида қатор бўлиб турмасликни илтимос қиламиз», — дейилади полиция хабарида.

Ҳуқуқ-тартибот идораларининг маълумотларига кўра, кун давомида шаҳар ҳудуди бўйлаб юзта ЙТҲ қайд этилган, бунда ўсиш кўрсаткичи 40 фоизни ташкил этмоқда.

Полиция департаментининг аниқлик киритишича, пойтахт йўлларидаги авариялар оқибатида ҳеч кимга жароҳат етмаган.

Олмаота шаҳри полиция департаментининг маълум қилишича, шаҳарга қор ёғгани сабаб бир кечанинг ўзида 39 та авария содир бўлган. Олинган жароҳатлар оқибатида икки киши вафот этган.

Шакар ҳокимлигининг маълумотларига кўра, ўтган кеча Олмаотага 4-7 сантиметр, тоғли ҳудудларга 10-12 сантиметр  қалинликда қор ёғган.

Эслатиб ўтамиз, 12 ноябрь куни Қамчиқ довонида ҳам қор ёғиб, кучли туман тушиши кузатилганди.