ОАВ: Танзанияда мамлакатдаги коронавирус билан боғлиқ вазиятни муҳокама қилиш тақиқлаб қўйилган

Танзаниянинг янгиликлар нашрларига мамлакатдаги коронавирус билан боғлиқ вазият ҳақида ёзиш тақиқлаб қўйилган. Бу ҳақда «Чегара билмас репортёрлар» (RSF) хабар тарқатди.

Тақиқ сабаблари бўйича ҳанузгача расмий маълумот йўқ. Сўнгги бор 29 апрелда мамлакат ҳукумати томонидан COVID-19 билан касалланиш ҳолатлари юзасидан ахборот берилган. Баҳорда берилган статистикага кўра 500 та касалланиш ва 21 та ўлим ҳолатлари кузатилган.

Маҳаллий нашрларда ишловчи журналистлар нималар бўлаётганини аниқлашга уриниб кўрган, аммо ҳукумат янги касалланиш ҳолатлари қайд этилмагани ва шу сабабли ҳам бу борада гапириладиган гапнинг йўқлигини маълум қилган.

Бу борада ахборот тўплашга уринган журналистлар ҳибсга олинмоқда. Газета ва журналларда касаллар ҳақидаги ва ҳукуматнинг қарорлари юзасидан суриштирув материаллари эълон қилинмаяпти.

Август ойида ҳукуматнинг журналистларга амалдорлардан ахборот олмай туриб, пандемия ҳақида материаллар эълон қилишни тақиқлаш ҳақидаги фармойиши қабул қилингани хусусида хабарлар тарқалган. Аммо ҳукумат вакиллари ушбу хабарлар юзасидан изоҳ бермаган.

Танзания RSF’нинг сўз эркинлиги бўйича рейтингида 124-ўринда жойлашган. Бироқ 2016 йилда ушбу давлатда бу борадаги кўрсаткич анча яхши эди ва Танзания мазкур рейтингнинг 71-поғонасида турарди.

BBC’нинг ёзишича, Танзанияда 2015 йилдан буён Жон Магуфили президентлик қилиб келмоқда. У коронавирус пандемияси даврида мамлакатда чиқарилган ўзига хос қарорлари билан тарихда қолган. Магуфили карантин даврида одамларни уйда қолишга эмас, аксинча масжидлар ва черковларга бориб ибодат қилишга чақирган. Кейинчалик ижтимоий масофаланиш ҳамда тиббий ниқоблар тақиш қоидаларига ҳам қарши чиққан. Мамлакатни ёпиш иқтисодиётга жиддий зарар келтиришини таъкидлаб, Танзанияга қўшни давлатларни локдаун эълон қилгани учун қоралаган. Шунингдек, Танзания президенти коронавирусни ҳаммомда терлаб, ингаляция орқали енгиш мумкинлиги ҳақида ўз даволаш услубини мамлакатда кенг тарғибот қилган.

Магуфили июнда мамлакатнинг коронавирусдан озод бўлганини эълон қилган. Танзанияда қурилган даволаш ва изоляция марказлари ёпилган.