Ўзбекистонга дам олиш кунлари совуқ ҳаво оқими кириши кутилмоқда

Ўзбекистон ҳудудига 12 ноябрь куни Волгабўйи ҳудудларидан совуқ ва нам антициклон кириб келиши натижасида ҳудудларнинг катта қисмида ёмғир, тоғли ҳудудларда эса қор ёғди. Республика бўйлаб жойларда ёғингарчилик кучли бўлди. Фақат Ўзбекистоннинг шимоли-ғарбий туманларида об-ҳаво ёғингарчиликларсиз бўлди.

«Ўзгидромет»нинг хабар беришича, 13 ноябрь куни ёмғир фақат Фарғона водийси вилоятларида, кечқурунга келиб Сурхондарё вилоятларида сақланиб қолади. Қолган ҳудудларда эса ёғингарчиликлар кузатилиши эҳтимолдан йироқ. Ҳаво ҳарорати 6-11 даража атрофида, ўртача меъёрлардан 5-7 даражага пастдир.

14—15 ноябрь кунлари республика ҳудудига Урал ҳудудларидан совуқ ҳаво кириши кутилмоқда. 14 ноябрда Қорақалпоғистон ва Хоразм вилоятида, 15 ноябрда Тошкент, Жиззах, Сирдарё, Андижон, Наманган, Фарғона вилоятларида қисқа муддатли ёғингарчилик (ёмғир, қор), қолган ҳудудларда эса ёмғир кузатилмайди. Баъзи жойларга туман тушиши мумкин. Шамол тезлиги секундига 15-20 метргача етиши мумкин.

Дам олиш кунларида ҳаво ҳарорати кечаси 0-5 даража илиқ, баъзи жойларда 1-3 даража совуқ, шимолий ҳудудларда эса 4-9 даража совуқ бўлади, кундузи эса 6-11 даража илиқ бўлади, бу ўртача меъёрлардан 5-7 даражага пастдир.