Ўзбекистон Президенти 12 ноябрь куни Қашқадарё вилоятига қилган ташрифи давомида Қарши шаҳрида барпо этилган IТ-технопаркда ҳам бўлиб, ёш веб-дизайнерлар ва дастурчилар билан учрашди. Шавкат Мирзиёев энг яхши давлат мобил иловасини ишлаб чиқиш бўйича Ўзбекистон олий таълим муассасалари талабалари ўртасида ўтказилган mGovAward танловида ғолибликни қўлга киритган қашқадарёлик ёшлардан тузилган жамоа вакилларини муваффақият билан табриклади. «Дарё» мухбири Миролим Исажонов мазкур жамоа сардори, Қарши шаҳридаги Global education ўқув маркази раҳбари Сардор Содиқовни суҳбатга чорлади.
Айни пайтда Тошкент халқаро Вестминстер университетида таҳсил олаётган Сардор Содиқов уч йилдан буён Global education ўқув марказини бошқариб келади. Мазкур таълим муассасаси вилоятдаги энг катта билим масканларидан бири ҳисобланади.
«Жамоамиз аъзоларининг барчасини ёшлар ташкил этади: ҳаммаси турли олий ўқув юртида ўқийди. Марказимиз рус, инглиз, корейс тилларида йигит-қизларга дарс беради. Кўпчиликка маълум, пандемия даврида мамлакатимиздаги ўқув марказлар фаолиятини тўхтатишга мажбур бўлди. Аммо бизнинг жамоа шижоатни туширмай, анчадан бери ўйлаб юрган режаларимиздан бирини амалга оширишга эришдик. Яъни марказимиз қошида видео студия очиб, инглиз тилидаги дарсларни тасвирга туширдик ва уларни мобил илова сифатида ўқувчиларга етказишга киришдик.
Иловамиз Play Маркет дастурида мавжуд бўлиб, тил ўрганиш истагидаги ҳамма ёшдагилар учун қулай ва соддалиги билан ажралиб туради. Бугунги кунга қадар мобил илова фойдаланувчилари сони 5 минг нафарга яқинни ташкил этади. Иловага 40 дан ортиқ дарсларни киритганмиз. Бошланғич дарслар бепул, сўнгра ҳар бири учун тўлов амалга оширилади. Барча дарсларни 60 минг сўмга юклаб олиш мумкин.
Инглиз тилини ўрганишга қизиқиши борларнинг ҳаммаси ҳам ҳар хил сабаблар туфайли кундузи репетиторга қатнашга вақт тополмайди. Аммо ушбу илова орқали видеоларни масофавий томоша қилиб, турли шаклдаги тестларни ечиб, билимни ошириш имконияти мавжуд. Ҳам вақт, ҳам маблағ тежалади. Фойдаланувчилар сони кун сайин ортиб бораётгани бизни чексиз қувонтирмоқда», деди Сардор Содиқов.
Ёш лидернинг таъкидлашича, Global education ўқув маркази вакиллари ушбу илова билан Ўзбекистон олий таълим муассасалари талабалари ўртасида ўтказилган mGovAward танловида қатнашиб, ғолибликни қўлга киритди. Улар яратган чет тилларини масофавий ўқитиш мобил иловасини такомиллаштириш учун 500 миллион сўм мукофот пули ажратилди.
«Мобил илова устида ишлаётган пайтимиз Ўзбекистон ва БАА ҳукумати биргаликда ўзбекистонлик ёшлар ўртасида танлов ўтказаётганини эшитиб қолдик ва ҳужжат топширдик. 260 дан ортиқ лойиҳа иштирок этган мазкур онлайн танловда жамоамиз ҳам қатнашди ва энг яхши мобил илова сифатида биринчи ўринга муносиб кўрилди. Мукофот пулини иловани янада ривожлантиришга сарфлаймиз», — деди тадбиркор.
Президент Шавкат Мирзиёев IТ-технопарк фаолиятини кўздан кечириш жараёнида Сардор Содиқов жамоасининг лойиҳаси билан ҳам танишган. Шунингдек, лойиҳани янада ривожлантириш, янги дастурий маҳсулотлар ишлаб чиқиш режаларини қўллаб-қувватлаш бўйича мутасаддиларга кўрсатмалар берган.
«Давлатимиз раҳбарига дастурий илова ҳақида маълумот бердик ва бу Президентимизга маъқул келди ҳамда ташаббусларимиз ва янги ғояларимизни қўллаб-қувватлашини билдирди. Жамоамизнинг ҳар бир аъзосига, яъни 5 кишига 5 минг доллардан мукофоти пули берилишини таъкидлади. Бизга нисбатан бундай эътибор янги ғоялар ва лойиҳалар устида ишлашимизга куч-қувват бериши шубҳасиз.
Президентимиз олий таълим муассасалари, илмий-тадқиқот институтлари ва ИТ-парклар ўртасида ҳамкорликни кенгайтириш зарурлигини айтди. Бундан ташқари, жамоамиз вакилларига ўзбек тилини чет элликлар ўртасида тарғиб қилиш ва ўргатишга мўлжалланган мобил илова яратиш таклифини ҳам билдирди. Бунинг учун нима зарур бўлса, кўмаклашамиз, деди. Бу таклифдан руҳландик ва уни албатта, амалга оширишни режалаштирдик. Шу билан бирга курсларни янада кўпайтирмоқчимиз. Хусусан, русийзабонлар учун рус тилидаги инглизча дарсларини ҳам йўлга қўйишни мақсад қилганмиз», — деди Сардор Содиқов.
Мавзуга доир:
Изоҳ (0)