Facebook компаниясига қарашли Instagram ижтимоий тармоғи дастурининг интерфейсига катта ўзгартириш киритилди. Ундаги асосий саҳифа қайта кўриб чиқилган, деб хабар беради IXBT.
Маълум қилинишича, иккита янги бўлим — Shop (дўкон) ва Reels пайдо бўлган. Киритилган янгилик сабаб бошқа интерфейс элементларининг ҳам жойлашуви ўзгарган.
Reels бўлими TikTok услубидаги қисқа видеороликларни ўз ичига олади. Аввалроқ халқаро масштабда тақдим қилинган сервис эндиликда Instagram’нинг асосий қисмларидан бири бўлади.
Shop бўлимида эса фойдаланувчилар харидга оид шахсий тавсиялар ҳамда махсус видеороликларни, шунингдек, янги коллекция ва бошқаларни кўриши мумкин бўлади. Бундан ташқари, ушбу бўлим бренд ва ишлаб чиқарувчилар билан боғланиш имкониятини яратади, дейилади хабарда.
Маълумот учун, 2019 йилда Instagram TikTok’га ўхшаш Reels дастурини синовдан ўтказаётгани ва Stories’да фойдаланиш имкони бўлган янги функция ёрдамида 15 сонияли роликлар суратга олиш, уларга эффектлар ва мусиқа қўшиш, видео тезлигини ўзгартириш мумкинлиги ҳақида хабар берилганди.
Изоҳ (0)