Ўзбекистонликлар карантин пайтида қайси мобил дастурларни юклаб олаётгани маълум бўлди

Ўзбекистонликлар сўнгги пайтларда смартфонларига кўпроқ ўйинларни юклай бошлади. Бу ҳақда App Annie сервиси маълумотларига асосланиб, Spot хабар берди.

1 мартдан 15 мартгача ўзбекистонликлар ўртасида энг кўп юкланган 100 та дастурнинг 17 фоизини ўйинлар ташкил этган бўлса, 15 мартдан 30 мартгача бу кўрсаткич 58 фоизга ўсган. Бу iOS  ва Android қурилмаларига бирдек тегишли.

Android’да ишловчи смартфонлар эгалари, масалан, Slap Kings, Hunter Assassin, Subway Surfers, PUBG Mobile, Fun Race 3D, Cover Strike, Stickman Party ва бошқа ўйинларни кўпроқ юклаб олмоқда.

iOS тизимида ишловчи смартфондан фойдаланадиганлар эса PUBG Mobile, Durak Online, Slap Kings, Special Force Group 2, Call of Duty: Mobile, Arrow Master, Save The Girl!, Dream League Soccer 2020 ва бошқа ўйинларни танлаган.

Карантинда ўзбекистонликлар ўртасида оммалашган мобил дастурлар орасида етказиб бериш хизматлари (LeBazar, Express24), видеосервислар (Allplay, Mediabay), ижтимоий тармоқлар (VK, TikTok) ҳам бор.

Энг оммабоп 100 та мобил дастур рўйхатига илк марта Netflix ҳам қўшилган.