Instagram’da TikTok ijtimoiy tarmog‘ining asosiy afzalligi bo‘lgan video yaratish funksiyasi paydo bo‘lishi mumkin. Ushbu funksiya Reels nomini oldi va hozirda ijtimoiy tarmoqning Braziliya segmentida sinovdan o‘tkazilmoqda, deb xabar beradi “Kod.ru”.
Foto: “Kod.ru”
Stories’da foydalanish imkoni bo‘lgan yangi funksiya yordamida 15 soniyali roliklar suratga olish, ularga effektlar va musiqa qo‘shish, video tezligini o‘zgartirish mumkin.
Bu roliklar Stories’da ham, maxsus Top Reels bo‘limida ham e’lon qilinadi.
TikTok’dan ko‘chirilgani yaqqol ko‘rinib turgan ushbu funksiya haqida Instagram mahsulotlarini boshqarish bo‘yicha direktor Robbi Steyn shunday deydi: “Bu yerda ikkita bir xil mahsulotni ko‘rmayapman. Musiqa bilan ishlov berilgan videoni ulashish universal g‘oya hisoblanadi. O‘ylaymizki, har bir foydalanuvchi undan foydalanishga qiziqish bildiradi”.
Avvalroq, TikTok O‘zbekistonda eng ko‘p yuklab olinayotgan mobil dasturlar Top-5 ligiga kirgani haqida xabar berilgan edi.
