Президент Шавкат Мирзиёев Қашқадарё вилояти фаоллари, маҳаллий кенгаш депутатлари, вазирлик ва идоралар раҳбарлари иштирокидаги йиғилишда ҳудудда таълим сифати қониқарсиз эканлигини айтиб, 2020 йил 191 та мактабнинг бирорта ҳам битирувчиси олий ўқув юртларига кира олмаганини таъкидлади. Бу ҳақда «Дарё» манбаси хабар берди.
«Маҳаллий кенгаш депутатлари мана шу 191 та мактаб директорининг олдига бориб, нимага бундай натижа бўлди, 11 йил давомида қилган ишларингиз шуми, деб савол бердими?», — деди давлат раҳбари бу ҳақда фикр билдирар экан.
Шавкат Мирзиёев вилоятдаги мактаб битирувчиларининг ОТМга кириши республикада энг паст кўрсаткич эканлигини айтган.
«Вилоят ўқувчиларининг Олий таълим муассасаларига кириши республика бўйича 13-ўринни қайд этган. Ваҳоланки, ўзи 14 та ҳудудимиз бор», — деган Президент.
Давлат раҳбарининг таъкидлашича, вилоятнинг 88 та мактабида меъёридан ортиқ ўқувчи ўқийди. 73 та мактаб филиаллари биноси пахсадан қурилган. Шу сабаб ҳам вилоятда пахсадан қилинган мактаблар биносини қайта қуриш ва таъмирлаш учун мактабларга 250 миллиард сўм, жиҳозлаш учун эса 20 миллиард сўм ажратилиши маълум қилинди.
Эслатиб ўтамиз, аввалроқ вилоятнинг Чироқчи туманидаги 61-мактабнинг қўрқинчли синфхоналари ижтимоий тармоқларда кўплаб муҳокамаларга сабаб бўлганди. Воқеалар ортидан тушган ОАВ вакиллари мазкур синфхоналарда икки йил давомида ўқувчиларга таълим берилганини фош қилди. Воқеалар хабар топган вилоят ҳокими Зоир Мирзаев эса, синфхоналарга ўтин киритиб, жамоатчиликни алдаган мактаб директорини вазифасига нолойиқ деб атади.
Изоҳ (0)