Шавкат Мирзиёев Қашқадарёда «оғир аҳволда»ги мелиорация, картошкачилик, узумчилик учун дастурий маҳсулотлар ишлаб чиқишни таклиф қилди

Ўзбекистон Президенти Шавкат Мирзиёевнинг Қашқадарёга ташрифи давом этмоқда. Ташриф давомида Президент Давлат хизматлари маркази ва Технопаркни кўздан кечирди, дея хабар бермоқда Президент матбуот хизмати.

Маълум қилинишича, Давлат хизматлари марказида 140 турдаги хизмат кўрсатиш учун барча шароит яратилган. Юқори тезликда интернет, замонавий техникалар фуқароларга тез, шаффоф ва қулай давлат хизматларини тақдим этишга мўлжалланган.

Таъкидланишича, 2020 йил февралда фойдаланишга топширилган ушбу муассасада шу пайтга қадар 300 мингдан зиёд давлат хизматлари кўрсатилган. Шундан 2 мингга яқини филиаллар орқали, мингга яқини эса сайёр тарзда амалга оширилди. Марказ биносида Президентнинг Халқ қабулхонаси ва Бош вазир қабулхонаси ҳам жойлашган.

Давлат раҳбари бу ердаги шароитлар билан танишиб, хизматлар кўлами билан қизиқди. Одамлар талабидан келиб чиқиб, янги хизмат турларини йўлга қўйиш, маҳаллалар билан онлайн боғланиб, аҳолига қулайлик яратиш бўйича топшириқлар берди.

Бундай марказларда кўрсатилаётган хизматлардан одамларнинг хабардорлигини ошириб, кенг фойдаланишга ўргатиш муҳимлигини таъкидлади.

«Давлат хизматлари маркази орқали одамлар давлатнинг эътиборини сезиши керак», – деди Шавкат Мирзиёев.

Қайд этилишича, Қарши шаҳрида барпо этилган ИТ-технопаркда ҳам веб-дизайнерлар, дастурчилар ва робототехниклар ўз фаолиятини бошлаган. «Бир миллион дастурчи» лойиҳаси доирасида ўқув курслари ташкил этилгани натижасида ахборот технологияларига қизиқувчи ёшларга кенг имконият яратилган.

Жумладан, энг яхши давлат мобил иловасини ишлаб чиқиш бўйича Ўзбекистон олий таълим муассасалари талабалари ўртасида ўтказилган mGovAward танловида қашқадарёлик ёшлардан тузилган жамоа ғолиб бўлди. Улар яратган чет тилларини масофавий ўқитиш мобил иловасини такомиллаштириш учун 500 миллион сўм мукофот пули ажратилди.

Президент ушбу ёш дастурчиларни муваффақият билан табриклаб, келгуси мақсадларини сўради. Уларнинг лойиҳани яна-да ривожлантириш, янги дастурий маҳсулотлар ишлаб чиқиш режаларини қўллаб-қувватлаш бўйича мутасаддиларга кўрсатмалар берди.

«Ҳар бир ҳудуднинг ўзига хос имкониятлари, долзарб муаммолари бор. IТ-парклар шулардан келиб чиқиб, дастурий маҳсулотлар яратиши керак. Масалан, Қашқадарёда мелиорация, картошкачилик, узумчилик оғир аҳволда, чорвачиликни, мева-сабзавотчиликни ривожлантириш учун қулай шароит бор. Шу соҳаларда ресурсларни тежаш, фойдали иш коэффициентини ошириш учун инновацион лойиҳалар зарур», – деди Шавкат Мирзиёев.

Олий таълим муассасалари, илмий-тадқиқот институтлари ва IТ-парклар ўртасида ҳамкорликни кенгайтириш бўйича кўрсатмалар берилди.