«Аёлми, эркакми, жиноят қилса, тенг жавоб бериши керак». Танзила Норбоева Гулнора Каримованинг қамоқда ўтирганига «аёл сифатида» муносабат билдирди

Жиноятчи қилган жинояти учун — у аёл ёки эркаклигидан қатъи назар — қонун олдида жавоб бериши керак. Бу ҳақда Ўзбекистон Сенати раиси Танзила Норбоева 12 ноябрь, пайшанба куни бўлиб ўтган матбуот анжуманида қисқача тўхталиб ўтди.

Пайшанба куни Тошкентда Ўзбекистон Гендер тенгликни таъминлаш масалалари бўйича комиссияси томонидан матбуот анжумани ўтказилди. Унда, жумладан, Гулнора Каримова билан боғлиқ ҳолат юзасидан ҳам фикр алмашилди, дея хабар бермоқда «Дарё» мухбири Мусулмонбек Иброҳимов.

Хусусан, Гулнора Каримова коронавирусга чалинган бўлиши мумкинлиги ҳақидаги хабарларга муносабат билдираркан, ИИВ Ҳуқуқбузарликлар профилактикаси бош бошқармаси бошлиғи ўринбосари, полковник Умида Абдуллаева бу гаплар асоссиз эканлигини таъкидлади.

Шунингдек, Сенат раиси Танзила Норбоева эса Гулнора Каримованинг қамоқда сақланишига аёл сифатида муносабати қандай экани ҳақидаги саволга жавоб берди.

«Гендер тенглиги ҳақида гапиряпмиз — аёлми, эркакми, жиноят қилса, тенг жавоб бериши керак», — деб таъкидлаган Танзила Норбоева.

Қайд этиш жоиз, Гулнора Каримова жиноят ишлари бўйича Тошкент вилояти судининг 2017 йил 18 декабрдаги ҳукми билан 10 йилга озодликдан маҳрум этилган (бу Гулнора Каримовага нисбатан қўзғатилган бир неча жиноят ишларидан фақат бири бўйича чиқарилган ҳукм), бироқ суднинг 2018 йил 1 июлдаги ажримига мувофиқ, «инсонпарварлик нуқтайи назаридан ҳамда маҳкума жиноий йўл билан орттирилган пул маблағларини қайтариш ва давлатга етказилган зарарни қоплаш мажбуриятларини ўз зиммасига олганлигини эътиборга олган ҳолда», унга тайинланган жазони 5 йиллик уй қамоғига алмаштирилган.

Шундан сўнг Гулнора Каримова, маълум бир чекловларга риоя этиш шарти билан, қизи Имон Каримованинг Тошкентдаги уйида яшай бошлаган. Бироқ жазони ўташ тартиби ва шартларини қасддан бузганлиги учун (эътиборга молик томони, бу белгиланган тартибнинг биринчи марта бузилиши бўлмаган) у жиноят ишлари бўйича Яшнобод туман суди қарори билан 2019 йил 5 март куни уй қамоғидан Зангиота туманидаги 21-сон умумий тартибдаги колонияга ўтказилган. Ижтимоий тармоқларда тарқалган турли хабарлар сабаб, Каримованинг қамоқхонадаги шароитлари юзасидан Омбудсман, Адлия вазирлиги ва ИИВ ўрганиш ва суҳбатлар ўтказган эди.

Аввалроқ, октябрь ойида Танзила Норбоева Тошкент вилоятининг собиқ бош инфекционисти Гулжаҳон Йўлдошева иши бўйича муносабат билдираркан, иш бўйича суд ҳукми чиққунига қадар унинг «аёл киши, кичкина боласи борлигини эътиборга олиб, ҳозирча қамоқда олмаслик ҳам мумкин» бўлганини таъкидлаган эди (Йўлдошева хоним Гендер тенгликни таъминлаш масалалари бўйича комиссияси аъзоси Саида Мирзиёеванинг мурожаатидан сўнг уй қамоғига ўтказилган эди).

Ноябрь ойи бошида ижтимоий тармоқларда Асалҳоней номи билан танилган Асал Хўжаева Маъмурий жавобгарлик тўғрисидаги кодекснинг ҳақорат қилиш ва майда безорилик бўйича айбдор деб топилиб, беш сутка маъмурий қамоқ билан жазоланган, бироқ орадан кўп ўтмай у Тошкент шаҳар Маъмурий суди Кассация инстанцияси қарори билан вояга етмаган фарзанди борлиги ва унинг ягона боқувчиси бўлгани боис маъмурий қамоқдан озод қилинган эди.