Футбол ишқибози учун севимли жамоасининг ғалабасидан-да яхшироқ нарса бўлмаса керак, айниқса, у қадрдон стадионда қўлга киритилса. Мухлислар учун эса ўз жамоаси мезбонлик ўйинларини ўтказадиган стадионлар худди ўз уйидек бўлиб қолган.
Дарҳақиқат, ҳозирда ўзгача дид билан бунёд этилган стадионлар шу қадар кўпки, уларни бирма-бир санаб чиқишга вақт камлик қилади. Шундай бўлса-да, имкон қадар энг ноодатий ва гўзал стадионлар жамланмасини эътиборингизга ҳавола этишга қарор қилдик.
Биринчи май стадиони (Пхеньян, КХДР, 1989 йил)
114 минг томошабинга мўлжалланган ушбу стадион дунёдаги энг катта ўйингоҳ ҳисобланади. Эгри аркалар ва том қисмингнинг шакли туфайли арена оппоқ гулни эслатади. Мазкур улкан иншоотни эса бир неча километр узоқликдан ҳам бемалол пайқаш мумкин.
«Маракана» (Рио-де-Жанейро, Бразилия, 1950 йил)
Узоқ вақт давомида дунёдаги энг катта деб ҳисобланган афсонавий стадион бир пайтлар ўз бағрига нақ 200 минг томошабинни сиғдира олган. Бироқ реконструкциядан сўнг ўриндиқлар сони 78 838 тага камайтирилди.
Арена расмий равишда «Марио Филҳо» деб номланади. Маълумотларга кўра, лойиҳанинг қурилишига улкан ҳисса қўшган журналист шарафига стадионга унинг номи берилган экан. Стадион бўйлаб бир қанча таъмирлаш ишлари олиб борилган, улардан энг охиргиси 2012 йилга тўғри келади.
«Оранж Велодром» (Марсель, Франция, 1937 йил)
Гарчи у аввалги кўринишини йўқотган бўлса-да, ушбу стадион рўйхатдаги энг қадимгиси ҳисобланади. 2014 йилги таъмирдан сўнг трибуналар устида пайдо бўлган ўзига хос геометрик рельеф жуда улуғвор кўринишга эга. «Оранж Велодром»да маҳаллий «Марсель» клуби ўз ўйинларини ўтказади. Арена ўз бағрига бир вақтнинг ўзида 67 минг томошабинни сиғдира олади.
«Арена да Aмaзoния» (Манаус, Бразилия, 2013 йил)
Арена 2014 йилги Жаҳон Чемпионати учун махсус қайтадан қурилган. Унинг дизайни ушбу номга мос келиб, ташқи панелларидаги нақшлар шакли Aмазония ўрмонларида яшовчи анакондалар терисини эслатади.
Аренанинг электр энергиясига бўлган эҳтиёжи қисман қуёш батареялари билан қопланади, шунингдек, ёмғир сувларининг ҳам стадион эҳтиёжлари учун ишлатилиши йўлга қўйилган. Стадион 44 минг томошабинга мўлжалланган.
«Миллий стадион» (Пекин, Хитой, 2008 йил)
«Қуш уяси». Хитой миллий стадиони ташқи кўриниши сабаб норасмий равишда айнан шундай ном олган. Ўз тузилиши ва ассиметрик юмалоқ фасади билан арена чиндан ҳам қуш уясига ўхшайди. Тунда эса стадион ҳайратланарли тусга киради. «Қуш уяси»да 80 минг киши севимли жамоаси ўйинини жонли кузатиши мумкин.
«Альянц Арена» (Мюнхен, Германия, 2005 йил)
«Бавария» клуби уй ўйинларини ўтказадиган «Альянц Арена» BPRO EXPERT талқинига кўра, дунёнинг энг чиройли стадиони деб топилган. Унинг ташқи томони худди ҳаво билан тўлдирилган ёстиқчаларни эслатади. Кечқурун ушбу ёстиқчалар «Бавария» ўйнаётганда қизил, Германия терма жамоаси баҳс олиб бораётганда эса оқ рангга бурканади. Аренага 75 минг мухлис ташриф буюриши мумкин.
«Камп Ноу» (Барселона, Каталония/Испания, 1957 йил)
«Барселона» клубининг уй стадиони бўлган стадион сиғими жиҳатидан Европадаги энг каттаси ҳисобланади. Арена 1957 йилда биринчи учрашувни ўтказганида унинг сиғими 90 минг мухлисга мўлжалланган эди. Шундан сўнг, 1982 йилги Жаҳон Чемпионати учун ўриндиқлар сони 120 мингтага кўпайтирилди. Бугунга келиб эса стадионга 99 минг нафар томошабин ташриф буюриши мумкин.
Арена ҳозирги «Камп Ноу» (каталон тилидан «янги ер» ёки «янги стадион» деб таржима қилинади) номини 2001 йилда олган. Унгача стадион «Барселона» стадиони деб номланган.
«Сантьяго Бернабеу» (Мадрид, Испания, 1947 йил)
«Кам Ноу»дан сўнг «Бернабеу»ни ёдга олмасак, «Реал» мухлислари учун адолатсизлик бўларди. ХХ асрнинг энг яхши футбол клуби уй аренаси ва Испания пойтахтининг ўзига хос ташриф қоғози бўлган «Сантьяго Бернабеу» ўтган асрнинг биринчи ярмида қурилган бўлиб, дастлаб у «Нуэво Чамартин» деб номланган. Арена фақат 1955 йилга келибгина «Реал Мадрид» собиқ ўйинчиси ва президенти шарафига ҳозирги номини олган. Дастлаб стадион 125 минг кишига мўлжалланган эди. 2011 йилги реконструкция ишларидан кейин у 84 минг мухлисни ўз бағрига сиғдираётганди. Айни дамда эса аренада яна таъмирлаш ишлари кетмоқда. Кўрамиз, бу стадионнинг сиғимига қанчалик таъсир ўтказар экан.
Изоҳ (0)