Иккита USB 4 порти, жуда кучли процессор ва графика. Apple М1 платформасидаги MacBook Pro 13 тақдим этилди

MacBook Pro 13 Apple’нинг мутлақо янги 5-нанометрли бир кристалли М1 платформаси яратилган иккинчи ноутбугига айланди, деб хабар беради IXBT.

Маълум қилинишича, CPU’нинг ишлаш самарадорлиги 2,8 баробарга, график процессорнинг самарадорлиги эса 5 бараварга ошган. Apple’дагиларнинг таъкидлашича, янги MacBook Pro 13 энг машҳур Windows ноутбуклардан ҳам уч баробар тезроқ ишлайди.

М1’га эга янги MacBook Air’да пассив совитиш тизимидан фойдаланилган ва у мутлақо шовқинсиз ишласа, MacBook Pro 13 актив элемент — вентилятордан фойдаланган. Умуман олганда, ушбу моделнинг ишлаш самарадорлиги MacBook Air’никидан юқори.

Агарда MacBook Air бир марта қувватланиш билан энг узоқ ишлайдиган Air’га айланган бўлса, янги MacBook Pro 13 — Apple тарихидаги энг узоқ ишлайдиган ноутбук бўлди. Унинг автономлиги 20 соатга етади. Тезкор хотираси 6 ёки 16 гигабайт, SSD ҳажми — 256/512 гигабайт ёки 1/2 терабайт.

Ранглар гаммасига ўзгартириш киритилмаган. Базавий версия нархи 1300 доллар. Янгиланган MacBook Pro 13’ни АҚШда 10 ноябрдан бошлаб буюртма қилиш мумкин, савдолар кейинги ҳафтадан бошланади.

Эслатиб ўтамиз, Apple’нинг 15 сентябрдаги тақдимотида Watch SЕ ҳамёнбоп «ақлли» соати ҳамда iPad планшетлари, 13 октябрда эса тўртта iPhone 12 смартфони тақдим этилганди.