Virgin Hyperloop компанияси янги турдаги транспорт воситасини яратиш бўйича катта қадамни амалга оширди — бортида одамлар йўловчилар бўлган «вакуум поезд» биринчи бор синовдан ўтказилди, деб хабар беради IXBT.
Невададаги DevLoop объектида жойлашган 500 метрли «труба»дан ичида иккита йўловчиси бор капсула ҳаракатлантирилган. Улардан бири компания ҳаммуассиси Жош Гигел ва йўловчиларни ташиш бўлими бошлиғи Сара Лучиан. Тажрибанинг иккала иштирокчиси ҳам тайёргарлик ва синов жараёнларидан ўтган, соғлиғи текширилган.
Сафар шартли номи XP-2 бўлган иккинчи авлод Pegasus Pod’нинг янги Hyperloop капсуласида амалга оширилган. Бу икки ўриндиқли транспорт воситаси. У Hyperloop туннелларида фойдаланиш режалаштирилган капсуланинг якуний кўринишига максимал даражада яқинлаштириб ишланган. Таъкидланишича, ягона фарқи пойга машиналаридаги каби беш нуқтали хавфсизлик камарлари бўлиб, у синов вақтида қўшимча хавфсизликни таъминлашга мўлжалланган.
Қулай тезланиш ва тормозланишни таъминлаш мақсадида ушбу тест давомида капсула тезлиги соатига 172 километр билан чекланган. Бу 2017 йилдаги синовлар охирида эришилган максимал тезликнинг (386 км/соат) ярмидан ҳам кам. Тезликнинг чекланганига трубалар узунлиги сабаб бўлган, улар етарлича тезланишни олиш учун калталик қилади. Маълум қилинишича, ваъда қилинган тезликка Ғарбий Виржинияда қурилаётган иккинчи Hyperloop объектида эришилади.
Эслатиб ўтамиз, 2017 йилда биринчи Hyperloop қувурининг қурилиши 2020 йилда бошланиши ва 50—60 километр узоқликдаги манзилга бориш беш долларга тушиши маълум бўлганди. 2018 йилда эса Hyperloop Transportation ўзининг биринчи тижорий қурилмасини БААда қуриши тўғрисида хабар берилганди.
Изоҳ (0)