Шавкат Мирзиёев ШҲТни Афғонистонга кўмак бериш бўйича режани қабул қилишга чақирди

Ўзбекистон Президенти Шавкат Мирзиёев Шанхай ҳамкорлик ташкилотининг аъзо давлатларини Афғонистонга кўмак бериш ва тикланиши бўйича қисқа фурсат ичида режа ишлаб чиқиш ва қабул қилишга чақирди.

Шавкат Мирзиёевнинг таъкидлашича, бугун Афғонистонда узоқ кутилган тинчликка эришиш бўйича тарихий имкониятни қўлдан бой бермаслик ҳар қачонгидан ҳам муҳим ҳисобланади. Ушбу мамлакатдаги хавфсизлик ва тинчлик масаласига бутун ШҲТ минтақасининг барқарорлиги ва иқтисодий тараққиётини таъминлашнинг муҳим таркибий қисми сифатида қаралиши лозим.

Президентнинг қайд этишича, халқаро ҳамжамият, жумладан, ШҲТ давлатларининг саъй-ҳаракатлари туфайли Афғонистонда низони тинч йўл билан бартараф этишда умидбахш истиқболлар кўринмоқда. Тинчликка эришиш, Афғонистон халқига иқтисодий ёрдам кўрсатиш йўлидаги ижобий интилишларни қўллаб-қувватлаш учун саъй-ҳаракатларни бирлаштириш муҳим аҳамиятга эга.

«Ишончим комил, Афғонистоннинг минтақавий савдо-иқтисодий жараёнларга жалб этилиши ҳам ушбу мамлакатнинг тинч ва барқарор тараққиётига хизмат қилади.

Шу муносабат билан, ‘ШҲТ—Афғонистон’ мулоқот гуруҳи доирасида Афғонистоннинг ижтимоий-иқтисодий тикланишига кўмаклашиш юзасидан амалий чора-тадбирлар режасини тез фурсатда ишлаб чиқиш ва қабул қилиш тарафдоримиз», — дея маълум қилди Ўзбекистон Президенти.

Давлат раҳбарининг фикрича, Афғонистонга унинг Марказий ва Жанубий Осиёни боғлаб турувчи кўприк сифатидаги тарихий ролини қайтаришга хизмат қиладиган транспорт йўлакларини барпо этиш ташаббуслари ШҲТнинг барча мамлакатлари учун янги истиқболлар очади.

Шавкат Мирзиёев мазкур масалаларни 2021 йил апрель ойида Тошкентда ўтказиладиган «Марказий ва Жанубий Осиё: минтақавий ўзаро боғлиқлик. Таҳдидлар ва имкониятлар» халқаро конференциясида муҳокама қилишни таклиф этди.

Шу билан бир қаторда, давлат раҳбари 2021 йилда ташкилотнинг 20 йиллиги арафасида «ШҲТнинг замонавий халқаро муносабатлар тизимидаги роли» халқаро конференциясини ўтказиш таклифини илгари сурди.