2020 йил 7 ноябрда Жо Байден АҚШнинг янги президенти бўлганидан кейин унинг рафиқаси, собиқ ўқитувчи Жилл Байден биринчи хоним мақомига эга бўлди. Шу муносабат билан Cosmopolitan нашри янги биринчи хонимнинг қандай кийиниши ва услубига эътибор қаратди.
Американинг собиқ биринчи хоними Мелания Трамп билан солиштирганда Байден сипо кийинади. Унинг кийиниш услуби консерватив ва тушунарсиз.
Гардеробининг асосини костюм-юбка, футляр бичимли либослар, пиджак ва классик шимлар ҳамда трикотаж кардиганлар ташкил қилади.
Жилл стилистлар хизматидан фойдаланмайди, ҳамма либосини ўзи танлайди. Бундан ташқари, бир либосни бир неча марта кийишдан, чўнтакбоп маркалардан харид қилиш, қиммат бўлмаган блузкалар ва 50 долларлик маржон тақишдан чўчимайди.
У турли рангдаги, сипо бичимли дизайнга эга либосларни кийишни хуш кўради. Вақти-вақти билан Dolce & Gabbana бренди коллекциясидан принтли кийимларни ҳам кийиб туради.
Кийим борасида консерватив эканлигига қарамай, оёқ кийим борасида эркин танлов қилиши мумкин. У классик учли туфлиларни, камарли ва боғичли, ёрқин ҳамда турли шаклдаги пойабзалларни кийиши мумкин.
Совуқ кунларда уни унча баланд бўлмаган пошнали ботфортда ҳам кўриш мумкин. Жилл Байденнинг кийиниш услубини кўпчилик Брижит Макроннинг кийиниш услубига ўхшатади. Бу икки хоним ўртасидаги ёлғиз ўхшашлик эмас: Брижит ҳам Жиллнинг ҳам касби ўқитувчи. Жиддий услубдаги костюм-юбка, учли туфли улар учун кундалик кийиниш услуби ҳисобланади.
Биринчи хоним бўлганига қарамай, Жиллнинг карьерасини тўхтатиш нияти йўқ, у маърузаларни давом эттириш ниятида. Берган интервьюларидан бирида касби у учун муҳим экани, одамлар ўқитувчиларни қадрлаши ва уларнинг жамиятга қўшган ҳиссасини англашини исташини билдирган.
Унинг омма олдида чиқиш ва расмий тадбирларга ташриф буюришга кўникишига ҳожат йўқ. Чунки у турмуш ўртоғи вице-президент лавозимида ишлаганида иккинчи хоним мақомида бўлган ва дресс-код билан яхши таниш.
Жо Байден сиёсат билан машғул чоғида Жилл нафақат мавқейига муносиб кийинишни, балки омма олдида ўзини қандай тутишни ҳам ўрганган. У Меланиядан фарқли равишда кўнгли очиқ, ўзига ишончи юқори ва исталган вақтда суҳбат ва баҳсга киришиши мумкин.