Шавкат Мирзиёев 2 май куни Тошкент халқаро инвестиция форуми доирасида БМТ бош котиби ўринбосари, Европа иқтисодий комиссияси ижрочи котиби Татьяна Молчанни қабул қилди. Бу ҳақда Президент матбуот хизмати хабар берди.
Суҳбат аввалида Татьяна Молчан президентга БМТ бош котиби Антониу Гутерришнинг саломи ва тилакларини етказди. Минтақа ва мамлакат миқёсидаги лойиҳаларни амалга ошириш ҳамда ўтган йил ноябрь ойида Боку шаҳрида БМТнинг Марказий Осиё иқтисодиётлари учун махсус дастури (СПЕКА) биринчи саммитида Ўзбекистон президенти томонидан илгари сурилган ташаббусларни рўёбга чиқариш масалалари муҳокама қилинди.
Давлат раҳбари комиссия 2030 йилга қадар барқарор ривожланиш мақсадларига эришишдаги муҳим ўрнини, унинг транспорт, инновация, атроф-муҳитни муҳофаза қилиш ва гендер тенглик, Ўзбекистоннинг ЖСТга қўшилиши масалаларидаги кўмагини қайд этди.
2030 йилгача бўлган даврга мўлжалланган СПЕКАни ривожлантириш концепциясини тез фурсатда қабул қилиш, дастурнинг мақсадли жамғармасини ишга тушириш ва қатор консептуал ҳужжатларни тайёрлаш муҳимлиги таъкидланди.
Изоҳ (0)