Шавкат Мирзиёев 2 май куни учинчи Тошкент халқаро инвестиция форумида иштирок этиш учун Ўзбекистонга келган Уммон Султонлиги савдо, саноат ва инвестицияларга кўмаклашиш вазири Қайс бин Муҳаммад ал-Юсуфни қабул қилди. Бу ҳақда Президент матбуот хизмати хабар берди.
Учрашув бошида Қайс ал-Юсуф давлат раҳбарига Уммон султони Ҳайсам бин Ториқ ал-Саиднинг самимий саломини етказди.
Ўзаро манфаатли ҳамкорликни, энг аввало, савдо-иқтисодий ва инвестициявий йўналишларда кенгайтириш масалалари кўриб чиқилди.
Энергетика, транспорт, соғлиқни сақлаш, туризм, геология, озиқ-овқат, тўқимачилик, кимё соҳаларида, шу жумладан Ўзбекистон-Уммон инвестиция компанияси кўмагида лойиҳаларни амалга ошириш учун катта салоҳият борлиги қайд этилди.
Яқин фурсатда ҳукуматлараро комиссия йиғилиши ва қўшма бизнес форумини ўтказишга келишиб олинди.
Трансафғон темирйўлини қуриш ҳамда Ўзбекистон—Туркманистон—Эрон—Уммон транспорт йўлагини илгари суриш масалалари юзасидан ҳам фикр алмашилди.
Изоҳ (0)