Навоий вилояти Навбаҳор туманида содир бўлган йўл-транспорт ҳодисаси оқибатида трактор ҳайдовчиси 27 ёшли йигитнинг ўнг қўлидан айрилишига сабабчи бўлди. Бу ҳақда ИИВ ахборот хизмати хабар қилган.
Хабарга кўра «Т-28» русумли тракторни бошқарган маст ҳайдовчи Навбаҳор тумани ҳудудида ҳаракатланиб кетаётган Тico’нинг олд ён томонига урилган. Оқибатда енгил автоуловдан қўлини чиқариб кетаётган 27 ёшли йигит зарб оқибатида ўнг қўлидан айрилган.
Қайд этилишича, маст ҳайдовчи содир бўлган воқеани тўлиқ англаб етмай, ЙТҲ жойидан кетиб қолган. Унинг ёнидаги турмуш ўртоғи жабрланувчиларга тиббий ёрдам бериш чораларини кўрган.
Трактор ҳайдовчисига нисбатан Жиноят кодексининг 266-моддаси 1-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш баданга ўртача оғир ёки оғир шикаст етказилишига сабаб бўлиши) билан айблов эълон қилинган. Жиноят иши бўйича ҳужжатлар тегишли чора кўриш учун Жиноят ишлари бўйича Навбаҳор туман судига юборилган.
Аввал Навоийда содир бўлган ЙТҲ оқибатида пиёда ҳамда ҳайдовчи, бошқа бир ЙТҲда вояга етмаган қизга машинасини бошқаришга берган ҳайдовчи, Matiz шинаси ёрилиши сабабли юз берган ЙТҲ оқибатида 2 ойлик чақалоқ вафот этгани ҳақида хабарлар берилган.
Изоҳ (0)