Фарғона ҳалқа автомобиль йўли (Р-112)нинг Андижон вилояти Асака тумани «Юқори Бўз» маҳалласи ҳудудидан ўтган қисмида 6 ноябрь куни соат тахминан 23:50 да инсон ўлими билан тугаган йўл-транспорт ҳодисаси содир бўлди, дея хабар бермоқда ИИВ Йўл ҳаракати хавфсизлиги бош бошқармаси.
Фуқаро М.А. бошқарувидаги ВАЗ-21011 «Жигули» автомобили қирғизистонлик ҳайдовчининг MAN юк автомобили билан тўқнашган. Оқибатда «Жигули»да бўлган уч киши оғир аҳволда касалхонага ётқизилган — икки нафари Асака туманидаги шифохонада вафот этган, яна бирининг аҳволи оғир, деб баҳоланмоқда.
«Ушбу ЙТҲнинг келиб чиқишига, аввало, ҳайдовчининг хавфли бурилиш жойида автомобиль бошқарувини йўқотиши, иккинчидан, тунги вақтда устунлардаги ёритиш чироқларининг ўчиқ бўлгани сабаб сифатида кўрсатилиши мумкин. Мазкур ҳолат бўйича ёритиш чироқларидан қарздорлик мавжуд бўлганини аниқладик — туман электр тармоқлари корхонаси томонидан ёритиш чироқлари ўчириб қўйилган. Шу жойда ёритиш чироқлари ишлаб турганида, бундай оғир оқибатли ЙТҲ содир бўлмаслиги ҳам мумкин эди», — дейди Андижон вилояти ИИБ ЙҲХБ бошлиғи Саидолим Зингиров.
Асака тумани Ободонлаштириш бошқармаси Кўча чироқлари бўлими бошлиғи Расулжон Акбаров вазият юзасидан изоҳ бераркан, «йўл кенгайиб, яна қўшимча чироқ устунлари ўрнатилгани туфайли, қарздорликлар кўпайиб кетган, оқибатда туман электр тармоқлари корхонаси устунлардаги чироқларни тармоқдан узиб, махсус шкафларни муҳрлаб қўйган». Қайд этишларича, кўчадаги чироқлари таъмирдан чиқарилган, янги ёритиш ускуналари ўрнатилган ҳолатда бўлган.
Андижон вилояти ИИБ ЙҲХБ вакили Фазлиддин Бурҳоновнинг таъкидлашича, автомобиль йўлида барча белгилар, чизиқлар, тўсиқлар меъёрларга мос, бироқ икки кун давомида устунлардаги чироқлар ишламаган. Унинг сўзларига кўра ҳозирда ЙТҲ юзасидан дастлабки тергов ҳаракатлари олиб борилмоқда ва Тергов органи томонидан вазиятга ҳуқуқий баҳо берилади.
Бу Андижон вилоятида сўнгги вақтларда қайд этилган одам ўлими билан боғлиқ ЙТҲларнинг дастлабкиси эмас. Аввалроқ, октябрь ойида Андижонда Damas юк машинасига урилиши оқибатида вояга етмаган йўловчи ҳалок бўлгани, Жалақудуқ тумани ҳудудидан ўтувчи Хонобод—Андижон автомобиль йўлида содир бўлган ЙТҲ оқибатида Damas ҳайдовчиси вафот этгани, сентябрь охирида Булоқбоши туманида Volvo юк машинаси ҳайдовчиси икки нафар қизалоқни босиб кетиб, хонадонларнинг бирига бориб урилиб, ўзи ҳам воқеа жойида ҳалок бўлгани ҳақида хабар берилган эди.
Изоҳ (0)