Навоий вилояти Конимех туманида бошқарувни йўқотган Nexia-3 автомашинаси ағдарилиб кетди, дея хабар бермоқда ИИВ.
Маълум қилинишича, Конимех туманидан ўтувчи 4Р-209 давлат аҳамиятига эга бўлган автомобиль йўлининг 43-километрида Nexia-3 русумли автомашинани бошқариб келаётган ҳайдовчи тезликни ошириши оқибатида бошқарувни йўқотган.
Натижада автомашина ағдарилиб кетиб, ўзидан олдинда кетаётган, ичида бир кундан сўнг никоҳ тўйи бўлиши керак бўлган ёшлар бор Malibu’га бориб урилган.
Ҳодиса оқибатида Nexia-3 автомашинаси ичидаги 28 ёшли йўловчи вафот этган.
Ҳолат юзасидан Зарафшон ИИБ Тергов бўлими томонидан Жиноят кодексининг 266-моддаси 2-қисми билан жиноят иши қўзғатилган.
Аввалроқ Навоий вилоятда бир неча юк ва енгил машиналар иштирокида йирик ЙТҲ юз бергани, Чироқчида Cobalt’лар тўқнашуви натижасида икки йўловчи ҳалок бўлгани ҳамда Андижонда чироқлари электрдан қарздорлик сабаб ўчириб қўйилган қоронғи трассадаги ЙТҲ оқибатида икки киши ҳалок бўлгани ҳақида хабар қилинганди.
Изоҳ (0)